Notisia

WILLEMSTAD – Ministerio di Enseñansa, Siensia, Kultura i Deporte (ESKD) den koperashon ku Fontys Hogeschool (lerarenopleiding) ta organisá un siman di profeshonalisashon pa tur dosente di enseñansa sekundario (vsbo/sbo/havo/vwo) riba dianan 22 te ku 25 aprel 2024. E siman aki ta keda organisá den kuadro di e Programa Mehorashon di Enseñansa Kòrsou 2023/2028 ku a keda presentá pa minister di ESKD sr. Sithree van Heydoorn.

Durante di e siman vários tayer (workshop) ta keda tené ku tópikonan di importansia manera Didáktika di Idioma, Story Circle ivm diversiteitcompetentie, Didáktika di Matématika, Maneho di grupo (klas) i hopi mas. Tur esakinan ta keda presentá pa un total di 7 dosente di Hogeschool Fontys. Na apertura e orador di òrden ta sr. Kennedy Tielman ku ta profeshonal den e área di multi-kulturalismo den enseñansa na Hulanda i Merka.

Dr. Kennedy Tielman a nase na Kòrsou i ku 18 aña e la bai Hulanda pa studia. E la traha den enseñansa sekundario komo dosente di kímika i despues di su doktoral den kímika e a bira dosente na Fontys Hogeschool. Dor di su funshon e ta bishitá hopi paisnan di Europa manera entre otro Portugal, Polonia, Marokko, Turkia, Dinamarka, Bélgika, Alemania i Spaña. Esaki ta pa traha huntu den koperashonan ku otro universidatnan ku ta prepará dosentenan. Tambe e ta traha riba un programa di profeshonalisashon den un proyekto di tres aña na Mozambique, Afrika.

Sr. Kennedy Tielman a doktorá den e disiplina di siensia di enseñansa (onderwijskunde) i ta keda konsiderá komo un di ekspertonan na Hulanda riba tereno di enseñansa pa gruponan multi-kultural. Un di su artíkulo sientífiko a gana un Award na aña 2021 komo e artíkulo ku mas a keda di ‘download’ for di un plataforma di un ‘journal’ internashonal. Su trabou sientífiko ta keda usá den área legislativo den Tweede Kamer na Den Haag den kuadro di lei ku ta trata diversidat den enseñansa sekundario (mbo/sbo). Tambe e ta keda aserká diferente biaha pa minister di OC&W di Hulanda pa duna konseho den e materia di enseñansa. Aktualmente e ta duna presentashon na vários organisashon rònt Hulanda i awor e la keda nombrá komo investigadó di e organisashon renombrá ‘New York University’ ku ta hasi investigashon sientífiko pa Estados Unidos.  Pa mas informashon por bishitá: www.kennedytielman.nl.

Ministerio di ESKD a manda invitá tur dosente di enseñansa sekundario via di nan direktiva i ta stimulá tur pa registrá pa partisipá na e siman di profeshonalisashon aki. Pa mas informashon por mail Ministerio di ESKD na Communicatie@owcs.gov.cw i nos ta manda e link di registrashon.

—

KOMUNIKASHON

MAS NOTISIA

Ministerio konserní: Enseñansa, Siensia, Kultura & Deporte