Notisia

WILLEMSTAD – Minister di Enseñansa, Siensia, Kultura i Deporte (ESKD) sr. Sithree van Heydoorn ta informá ku e simposio relashoná ku Karnaval lo tuma lugá dianan 24 i 25 mei di 2024. Komo titular enkargá ku Karnaval minister ta gradisí un i tur ku a duna nan kontribushon pa engrandesé nos karnaval. Nos kultura karnavalesko ta dushi i bunita. Nos tin un produkto kreativo úniko i kisas nos no ta realisá kon grandi Karnaval, komo manifestashon kultural, ta. E aña akí un biaha mas Kòrsou a demostrá esaki.

P’esei nos ta sigui traha ku kurason na adelanto. Nos ta konsiente ku tur e retonan ku a presentá durante di e temporada akí, manera tur aña di nobo ta e kaso, mester di atenshon. Nos a logra di kue kamind’i tera. Nos a hòl e djaki, hòl e djaya, i a mantené nos humildat pa sali afó. Nos a enfrentá retonan manera kùrmentu di vehíkulo, edifisio dekaí riba ruta, trahenan ku tabata (òf  no) pèrmití, si ta tene kuenta òf nò ku norma i balor di nos pueblo, i e manera ku nos ta tene kuenta ku otro i demostrá rèspèt pa otro, entre otro. Tur esaki ta puntonan importante ku por kibra òf engrandesé nos fiesta nashonal.

For di e momento ku mi a tuma e responsibilidat komo minister, mi a pidi na mi Ministerio di ESKD, pa nos organisá un simposio tokante tur aspekto relashoná ku Karnaval pa nos yega na un vishon di mas aña pa Karnaval duradero i sostenibel. Huntu ku sektor di Kultura i Deporte a pone e fechanan 14 pa 16 di yüli di 2022, pero pa motibunan finansiero esaki no a kristalisá. Tambe nos a tene un konferensia di prensa den luna di sèptèmber di aña 2023 kaminda nos a anunsiá un strategia nobo pa huntu ku universidatnan University of Curaçao (UoC) i Inter-Continental University of the Caribbean (ICUC) nos traha riba e simposio. Nos universidatnan ta enkargá ku e kolekshon di dato di forma sientífiko pa asina nos haña dato verídiko ku por duna nos un base verídiko pa e simposio su resultado por ta sostenibel i duradero. Huntu, UoC i ICUC ku Sektor di Kultura i Deporte, a kuminsá ku e preparashonnan pa asina logra hasi un investigashon tokante Karnaval i e investigashon ta kanando den bon direkshon.

E investigashon tin dos aspekto: kuantitativo i kualitativo. UoC lo ta na enkargo di un imbestigashon kuantitativo eksplorativo ku ta bai duna un bista riba e deseonan i ideanan di gruponan di interes (stakeholers) e fiesta nashonal Karnaval. ICUC ta na enkargo di e investigashon kualitativo. E 9 temanan ku a skohe, ku ta e base pa yega na e vishon pa un karnaval sostenibel i duradero, ta:

1. Karnaval i Marcha (Grandi, Mucha, Teener, Bándabou, Kabai, Jouvert Mourning);
2. Karnaval i Ruta;
3. Karnaval i Públiko (aksesibilidat, infrastruktura, seguridat);
4. Karnaval i Finansa;
5. Karnaval i Edukashon;
6. Karnaval i Seguridat;
7. Karnaval i Festival di Tumba;
8. Karnaval i Organisashon;
9. Karnaval i Globalisashon.

Durante e delaster siman di febrüari e invitashonnan lo sali pa tur grupo di interes partisipá na e diferente enkuentronan pa kolekshoná dato relashoná ku e temanan. E kolekshon di dato den forma di enkuesta i ku diferente enkuentro ku gruponan di enfoke ta kulminá den un simposio nashonal. E promé parti di e simposio ta tuma lugá dia 24 i 25 di mei 2024, despues e di dos parti ta tuma lugá na ougùstùs benidero. Ministerio di ESKD ta anunsiá e fechanan na tempu pa asina por tene kuenta ku esaki.

Un apelashon na tur partido di interes pa duna un aporte na e proseso akí. Un proseso ku ta tuma su tempu pa nos por atendé debidamente ku e retonan i trese solushonnan duradero bou di guia di nos universidatnan UoC i ICUC. Un yamada ta bai na tur ku ta duna nan kontribushon na Karnaval pa na momento ku rekomendashonnan ta kla i Gobièrnu di Kòrsou implementá esaki, kada unu di nos ban tene nos mes na esakinan.

—

Sr. Sithree van Heydoorn

Minister di Enseñansa, Siensia, Kultura i Deporte

MAS NOTISIA

Ministerio konserní: Enseñansa, Siensia, Kultura & Deporte