Publiká riba 09 Yüni 2026
Willemstad – Djamars 9 di yüni e Simposio Integridat a tuma lugá, kaminda ministernan, topkader di Gobièrnu, supervisornan i representantenan di sektor privá a reuni pa reflehá riba e importansia di integridat pa e desaroyo kontinuo di Kòrsou.
Integridat ta un di e pilarnan mas importante pa un pais fuerte i próspero. Un komunidat íntegro ta kontribuí na un kosto di bida mas abou, ta fortifiká e klima di invershon i ta promové konfiansa di siudadanonan i empresarionan den gobièrnu i institushonnan.
Aunke Kòrsou, den komparashonnan regional i internashonal, ta score relativamente bon riba diferente tereno, tambe ta rekonosé ku tin espasio pa sigui mehorá i fortifiká nos integridat. Integridat a wordu deskribí komo un responsabilidat komun di gobièrnu, sektor priva, prensa i komunidat.
Den e diskurso di apertura Minister Shalten Hato (BPD i Hustisia) a trese na atenshon diferente paso konkreto ku Kòrsou a tuma den e último dekadanan pa promové integridat i bon gobernashon. Entre otro, a menshoná Ombudsman, SBTNO, e Lei di Transparensia di Gobernashon (Landsverordening Openbaarheid van Bestuur) i e independensia di Konseho Elektoral komo logro importante.
Un parti speshal di e programa tabata e entrega seremonial di e Rapòrt di Integridat na Gobernadó di Kòrsou, Su Ekselensia señor M.J. De Kort. Na nòmber di Ministerio di Maneho di Gobernashon, Planifikashon i Servisio Públiko, minister Hato a presentá e rapòrt. E akto simbóliko aki a resaltá e importansia di sigui komprometé ku integridat, transparensia i un gobernashon públiko responsabel.
E Baseline Scan a ser realisá via di un enkuesta digital i un análisis kualitativo i kuantitativo. Mas ku 300 funshonario públiko di tur nuebe ministerio a partisipá. E resultadonan ta mustra, entre otro, un diferensia entre konosementu di politika di integridat i e implementashon real den práktika, asina tambe un nesesidat grandi pa dialogo i guia riba temanan di integridat.
E skèn ta sirbi komo un punto di partida importante pa e desaroyo di un politika di integridat mas spesífiko pa kada ministerio. E medishon inisial a tuma lugá na september 2025 i ta planifiká pa repetí esaki kada dos te tres aña, manera parti di un siklo struktural di planifikashon, evaluashon i mehorashon.
Na e simposio tambe tabatin presente minister Sithree van Heydoorn (OWCS), minister Charetti America (SOAW), minister Roderick Middelhof (EO) i minister Charles Cooper (Finansia i VVRP).
For di Ministerio di Maneho di Gobernashon, Planifikashon i Servisio Públiko (BPD), integridat lo sigui haña atenshon prioritario den e añanan ku ta bini. Den e kuadro ei, ta wordu trahá riba diferente inisiativa manera e establesementu di un Bureau Integridat, introdukshon di personanan di konfiansa i un sistema struktural pa atendé kehonan eksterno. E proyekto di lei pa e Bureau Integridat ta aworaki den su fase final di konsulta i ta spera di drenta e proseso ofisial mas despues den e aña aki.
Durante e simposio a subrayá ku progreso duradero solamente ta posibel ora tur sektornan ta traha huntu i tuma responsabilidat. E partisipantenan a mustra nan kompromiso pa sigui fortifiká kolaborashon i konsientisashon riba integridat na Kòrsou.
