Publiká riba 21 Yanüari 2020
Willemstad- Entrante 1 di yanüari último tur produktor i eksportador lokal lo mester hasi uso di un sistema digital designá pa asina produktonan por drenta Union Oropeo sin paga derecho di importashon. Ta trata aki di e sistema digital REX (Registered Exporter System). Den kuadro di esaki, a organisá un tayer resientemente pa informá i interaktuá ku gruponan di interes riba introdukshon di e sistema aki.
E tayer aki a keda organisá pa Ministerio di Finansa (Duana) huntu ku Ministerio di Desaroyo Ekonómiko (MEO) i ku sosten di Ofisina di Turismo di Kòrsou.
Durante di e tayer tabatin seshon(nan) interaktivo i informativo ku a konta ku partisipashon di diferente produktor i eksportador lokal pero tambe nos kuerpo di duana i duaneronan prosedente for di paisnan den region.
Pa e tayer aki a aserká ekspertonan di Taxation and Customs Union of the European Commission (TACUD) huntu ku duana di Noruega i Suisa pa asina por a bini i duna un splikashon amplio i kontestá posibel preguntanan riba e sistema di REX. Ku orguyo nos por mira bek riba un tayer sumamente eksitoso ku a konta ku partisipashon di masoménos 30 partisipante di Duana for di Aruba, Boneiru, St. Maarten, St. Lucia, Grenada, Dominica, Belize, Sürnam i tambe duaneronan lokal.
Komo un bon anfitrion nos no por a laga e oportunidat aki pasa sin duna e bishitantenan un poko di e sabor di Kòrsou su atrakshonnan i nos hospitalidat. E koperashon entre MEO i Duana ku sosten di CTB a kana sublime i e tayer riba introdukshon di e sistema digital REX tabata sigur un éksito.
