KOMUNIKADO DI PRENSA
Situashon di kandela na Kaya Telekomunikashon ta bou di kòntròl
WILLEMSTAD – Brantwer Kòrsou ta informá komunidat ku despues di un operashon intensivo di mas ku 24 ora, e kandela grandi ku a surgi na un establesimentu na Kaya Telekomunikashon awor ta bou di kòntròl. E kandela a konsentrá den diferente kònteiner ku tabata tin diferente tipo di produktonan kímiko den nan.
E mèlding inisial a drenta djamars 12 di mei atardi alrededor di 4:18 p.m. For di e momentu ei te ku djárason anochi, ekiponan di Brantwer Kòrsou a traha sin deskanso pa logra kontrolá i finalmente paga e kandela den su totalidat. Durante e operashon, Brantwer a hasi uso di diferente método pa paga esaki. Inisialmente a kombatí e kandela ku awa. Pa despues usando ekipo pisá a separá algun kontainer ku tabata na kandela for di e otronan pa kita e peliger di kandela for di nan. Posteriormente a usa tera i finalmente santu pa logra “stik” e kandela ku tabata konsentrá den algun kònteiner i asina eliminá e último restu di kandela.
Apesar ku e kandela mes a ser pagá, ainda tin molèster di huma den sierto momentunan, prinsipalmente ora bientu ta fuerte. Pa motibu di esaki, Brantwer Kòrsou ta sigui pidi habitantenan den bisindario pa mantené bentana i portanan sera si nan eksperensiá molèster di huma òf oló fuerte.
Durante e periodo di emergensia, diferente instansianan gubernamental a traha huntu den un manera kordiná pa garantisá seguridat públiko. Brantwer Kòrsou a mantené komunikashon i kordinashon kontinuo ku Kuerpo Polisial Kòrsou i ekspertonan di GMN relashoná ku e gasnan toksiko ku por a liberá durante di e kandela. Kuerpo Polisial Kòrsou, Ministerio di SOAW i Slachtoffershulp a duna sosten importante durante e operashon dor di yuda ku e evakuashon di personanan ku tabata den e área, ku e propósito pa evitá ku nan ta inhalá huma potensialmente peligroso òf toksiko.
GMN lo sigui durante e próksimo dianan ku investigashon relashoná ku e gasnan ku a liberá den ambiente, pa evaluá kualkier riesgo eventual pa salubridat públiko i medio ambiente.
Ademas, Kuerpo Polisial Kòrsou, pa medio di su departamento di reshèrshinan táktiko, lo kuminsá un investigashon amplio pa determiná e kousa eksakto di e kandela i unda e kandela por a originá.
Brantwer Kòrsou kier gradisí tur partnernan di emergensia, boluntario, i tambe komunidat pa nan pasenshi i koperashon durante e situashon aki. Seguridat di komunidat ta i lo sigui ta prioridat number unu.
[Fin di komunikado]
