Skol a kuminsá ku hopi energia positivo i bon prepará - Informashon tokante Gobièrnu di Kòrsou Bo opinion

Notisia

Skol a kuminsá ku hopi energia positivo i bon prepará

Geplaatst op 20 August 2020 dor di Ministerio Enseñansa, Siensia, Kultura & Deporte

WILLEMSTAD – Gobièrnu di Kòrsou ta informá ku skolnan a ranka sali den un ambiente hopi positivo i energétiko. Ku hopi alegria nos muchanan i hòbennan a bai skol awe riba e promé dia di skol. E situashon di Pandemia relashoná ku e vírùs di Corona COVID-19 ta un punto di hopi preokupashon den komunidat i esaki a trese hopi preparashon den skolnan i na kas. Ministerio di Enseñansa, Siensia, Kultura i Deporte (ESKD) huntu ku tur e partidonan den enseñansa a prepará pa e situashon aki i a logra start e aña eskolar den un ambiente di positivismo.

A duna instrukshon i rekomendashon na e direktivanan pa nan por tene nan mes na djé den un karta ku Minister Rhuggenaath a firma. Enkuanto e situashon di riesgo pa ku krísis di COVID-19 na i rondó di skolnan, Ministerio di ESKD a manda un karta pa tur direktiva di skol kaminda ta elaborá riba e puntonan manera: limpiesa, higiena, regla pa bishita di mayor na skol, regla pa alumno i/o dosentenan ku ta bin bèk Kòrsou for di paisnan di riesgo, aktividat den aire liber, regla pa ku distansia sosial (2 meter) i mas. Direktivanan di Skol i skolnan huntu ku maestro i dosentenan ta duna kontenido na e instrukshonnan aki den kada skol. Alabes a informá nan ku e tim di kontròl lo hasi bishita na e skolnan pa asina por tuma nota di e situashon nan kada skol.

Konsiderando e situashon di krísis aki Minister ta pidi atenshon na e ambiente sosio-ekonómiko ku famianan por pasa aden, situashon pa ku e tema di enseñansa obligatorio, EFO, Eksamen Sentral, Buki di Eksamen 2020/2021 i posibel retraso ku e alumno por kuminsá kuné dor di e situashon di ‘lock down’ anteriormente. Tur e puntonan aki a keda tratá den un karta kaminda Gobièrnu ta informá e direktivanan di skolnan. Otro punto ku ta di gran balor agregá ta e hecho ku via di Ministerio di Salubridat Públiko, Medio Ambiente & Naturalesa a logra haña dos dòkter hubenil mas pa duna asistensia na Ministerio di ESKD pa ku e situashon di salubridat i malesa.

Transporte eskolar
Pa loke ta transporte eskolar, por indiká ku mayor i yunan ku a apliká, a risibí kontesta, teniendo kuenta ku tur e kondishonnan ku nan mester kumpli ku né. Alabes ta importante partisipá ku tur shofùr di transporte eskolar mester kumpli ku tur rekesitonan pa por transportá mucha i asina garantisá seguridat di nos muchanan. Na momentu ku konstatá ku nan no ta kumpli ta duna nan espasio pa kompletá nan dokumentonan i/o adaptá kondishonnan i asina nan por sigui ku e enkargo. Durante di aña e kontròl ta keda tuma lugá (spot check) pa asina sigui garantisá e seguridat na skol i pa ku e shofùrnan.

Limpiesa
Teniendo kuenta ku limpiesa ta di sumo importansia pa evita plamamentu di e vírùs di corona (COVID-19) ta pone atenshon speshal na esaki tambe. Pesei Gobièrnu ta traha riba un fondo adishonal di karakter insidental pa e skolnan por haña un finansiamentu ékstra pa ku kompra di material pa limpiesa manera habon, ‘hand sanitizer’ i papel. Pa kualke informashon adishonal por yama na 434 3702 òf mail na OWCS.Communicatie@gobiernu.cw.

Awor mas ku nunka, dilanti un aña eskolar nobo, ban ta dediká i embolbí na edukashon di nos TUR su yunan. Komo mayor/famia, empresario, kompania, grupo di boluntario, ban huntu mara na otro i komprometé pa elevá nos enseñansa den e aña eskolar 2020-2021.
Gobièrnu ta deseá henter pueblo di Kòrsou un bon komienso di aña.


Komunikashon

** Riba fotonan athunto por tuma nota di bishita di Minister di ESKD sr. E.Rhuggenaath na M.M. Römerschool den kompania di direktor interino di Servisio di Skolnan Públiko sr. R. Römer i direktor di Sektor di Enseñansa & Siensia sr. W.Kleinmoedig.

Ministerio konserní