Notisia

Skol Prinses Margriet ta haña bishita di Minister

WILLEMSTAD – Den kuadro di digitalisashon di enseñansa tin vários trayekto a keda ehekutá pa yega na un infrastruktura optimal i moderno pa enseñansa por tuma lugá den e era digital. Gobièrnu a firma vários akuerdo ku organisashonnan pa huntu traha riba e trayekto aki. Pesei Minister di Enseñansa, Siensia, Kultura i Deporte (ESKD) sr. Sithree ‘Cey’ van Heydoorn a bishitá e skol ku a keda modernisá i restrukturá di forma optimal i ta kla pa mas ku 80% pa por implementá enseñansa di forma digital. Skol Prinses Margriet ta e promé skol ku ta sirbi komo modelo pa implementashon i ehekushon di enseñansa digitalisá.

Skolnan modelo mester kumpli ku e kondishonnan di e era moderno teknológiko pa implementá e programanan di enseñansa di forma virtual i digitalisá. Pa kumpli ku e kondishonan aki mester tene kuenta ku vários aspekto di e infrastruktura di e edifisonan mes i tambe e instalashonan tékniko i elektróniko. Puntonan di atenshon ta iluminashon, seguridat, kolekshon di datos, standarisashon efisiente di instalashonan tékniko, ventilashon, lokalidat, ekipo i hopi mas.

Ministerio di ESKD a traha huntu ku Direktiva di Skolnan Públiko pa asina prepará e skol aki pa bira un skol modelo. E direktor Xiomara Mathilda e tempu ei, a traha huntu ku e personal i bario pa asina optimalisá i huntu kuida e skol. Na mes momentu a traha huntu ku vários kompania mas pa restrukturá e edifisio i infrastruktura digital ku ta duna e skol e empuhe pa traha mas den e área di digitalisahon. E trayekto aki a tuma nan mas o ménos 6 aña pa huntu a yega awe na e logro aki. 

Minister van Heydoorn a haña un amplio splikashon di direktor di Servisio pa Skolnan Públiko sr. R. Römer, huntu ku e tim di digitalisahon di e organisahonnan ku a traha riba e infrastruktura di e edifisio i e infrastruktura digital. Tambe a tene un rekorido den henter e skol i a pasa kuminda mayoria di e dosentenan i muchanan durante di e mainta. Minister  di ESKD sr. Sithree ‘Cey’ van Heydoorn ta sigui kana ku e trayekto di digitalisahon pa huntu yega na implementashon di enseñansa digitalisá.

** riba e potrètnan por tuma nota di e bishita na e skol modelo Prinses Margriet

Pa mas potrèt por bishita e facebook di Ministerio di ESKD: Bishita na PMS

MAS NOTISIA

Ministerio konserní: Enseñansa, Siensia, Kultura & Deporte