Publiká riba 09 Novèmber 2017
Willemstad – Ministerio di Desaroyo Sosial, Labor i Bienestar (SOAW), Fundashon Korporashon pa Desaroyo di Kòrsou (KORPODEKO) i Ministerio di Desaroyo Ekonómiko (MEO) a lansa un proyekto yamá “Mikro Fiansa” na Sentro Kultural Flor di mi Bario. Ta e intenshon pa e proyekto piloto aki bira un modelo sólido pa krea empresarionan di futuro.
Inisio
Sr. Chesron Isidora (Direktor di KORPODEKO) a splika motibu di eksistensia di KORPODEKO. Ta asina, sr. Isidora a enfatisá, ku banda di e echo ku KORPODEKO ta un instansia finansiero, e ta un instansia tambe pa desaroyo (riba áreanan sosio-ekonómiko, kultural i edukativo). Ku esei KORPODEKO tin un lisensia pa duna fiansa, ‘un di e armanan di mas fuerte ku KORPODEKO por usa’ pa brinda desaroyo na nos komunidat.
Mas òf ménos un aña pasá, KORPODEKO a aserká Ministerio di Desaroyo Sosial, Labor i Bienestar ku e idea pa krea un programa (Mikro Fiansa) debí ku e idea tin puntonan komun ku Ministerio di Desaroyo Sosial, Labor i Bienestar. For di un kòmbersashon a bini un proyekto konkreto pa yuda e persona kreativo na realisashon di su soñonan.
Mikro Fiansa
Konforme análisis ku KORPODEKO a hasi, Mikro Fiansa ta funshoná solamente ora por desaroyá e mikro empresario. ‘Sin e preparashon, sin e guia, sin e “coaching”, sin e “after care” bo no tin esei’. Sr. Isidora a bisa tambe, durante lansamentu, ku den e próksimo simannan ku ta bini, yegando te na luna di yanüari, lo bai drenta barionan di Kòrsou pa buska hendenan ku tin e ideanan pero no tin e forma ni rekursonan pa realisá e ideanan ku nan tin. Ta e intenshon pa haña 400 hende pa kuminsá e proyekto piloto di Mikro Fiansa.
Detayenan
Den e promé fase lo tin reklutamentu (recrutement) intenso ku SOAW i MEO den bario, tambe via BETH di MEO. Interesadonan por inskribí i tuma informashon, despues lo sigui prosesonan di entrenamentu i preparashon di hendenan pa krea un plan, algu pa nan mes implementá. E preparashon lo ta interaktivo, distinto for di tuma lès tras di banki di skol. E persona lo siña hasiendo diferente tarea pa logra su meta den un forma interaktivo. Despues lo sigui ku e proseso di coaching i lo monitor kada empresario nobo. Pa loke ta e fiansa, esaki lo konsistí primordialmente di material pa e trabou i despues di e promé aña di training i coaching intensivo, kaminda ta bishitá i interaktá regularmente ku e mikro-empresario. Lo bishitá e empresario nobo ku regularidat i lo dokumentá tur kos pa esaki por sirbi pa mehorá e programa i, den futuro, yega na un modelo ideal i sólido pa kreashon di empresarionan ku hopi éksito.
Riba e imágen bo ta mira: Vernon Huerta (Presidente di direktiva di KORPODEKO), Minister Steven Martina (Minister di Desaroyo Ekonómiko), Minister Hensley Koeiman (Minister di Desaroyo Sosial, Labor i Bienestar) i Chesron Isidora (Direktor di KORPODEKO).
