Publiká riba 13 Sèptèmber 2021
WILLEMSTAD – Ministerio di Desaroyo Sosial, Labor i Bienestar ta anunsiá ku ta bai kuminsá ku e proseso pa evaluá e dos medidanan di asistensia di emergensia relatá na e pandemia di COVID-19. Ta trata di e medida pa duna sosten laboral i e medida pa duna asistensia den alimentashon (esta pakete di kuminda, kuminda kayente i karchi pa kuminda).
Lo bai evaluá si mester sigui ku e asistensia di emergensia den e forma aktual i kon largu mas lo mester sigui ku esaki. Durante e último lunanan e kantidat di aplikashon pa asistensia a baha konsiderablemente. E periodo di evaluashon lo dura un (1) luna, kuminsando 13 di sèptèmber.
Durante e periodo di evaluashon, e portal pa hasi aplikashon lo ta será. Petishonnan ku ta den tratamentu kaba lo sigui segun e proseso di evaluashon vigente.
