Solushonnan nesesario pa departamentu di Reibeweis ainda den proseso - Informashon tokante Gobièrnu di Kòrsou Bo opinion

Notisia

Solushonnan nesesario pa departamentu di Reibeweis ainda den proseso

Geplaatst op 04 June 2020 dor di Ministerio Maneho di Gobernashon, Planifikashon i Servisio Públiko

WILLEMSTAD – Minister Konket di Gobernashon, Planifikashon i Servisio Públiko  a enkargá un komishon ku análisis di e problemátika di lista largu di espera pa pasa eksámen na departamentu di Reibeweis. Tambe a pidi e komishon pa formulá rekomendashonnan pa e problemátika aki.

E komishon a hasi un gran trabou. Sinembargo, e krísis di COVID-19 a buta ku ta difísil pa yega na e fondonan nesesario pa apliká e rekomendashonnan di e komishon. Esaki ta enserá entre otro ku no por sera kontrakt ainda ku eksaminadónan adishonal pa por atendé e problema. Tin biaha, pa dispuesto ku un persona ta pa realisá kambionan, sa surgi kosnan ku ta fuera di su alkanse i ku ta buta ku kambionan ta tarda.

T’asina ku Gobièrnu su entradanan a baha drástikamente debí ku ekonomia a kasi paralisá pa motibu di e ‘lock down’. Loke ta nifiká ku Gobièrnu no ta risibí sufisiente entrada, pa medio di impuesto, pa por kumpli ku su obligashonnan. Ta entre otro pa e motibu ei ku a pidi Hulanda sosten finansiero.

Konseho di Minister, den kuadro di e krísis di COVID-19, a dekretá un asina yamá ‘verplichtingenstop’. Ta nifiká ku no por hasi niun kompromiso ku no tabata planiá previamente. Ta p’esei nos no a logra ainda pa sera kontrakt ku eksaminadónan adishonal. Gerensia di departamentu di Reibeweis ta hasi su máksimo esfuerso pa yega na e fondonan nesesario i ta den konsultá ku Ministerio di Finansa pa mira kon por yega na un solushon.

Na públiko en general, i prinsipalmente e personanan ku ta keda direktamente afektá pa e situashon, Gobièrnu di Kòrsou ta pidi diskulpa i un tiki pasenshi mas pa atendé e situashon ku a surgi.

Ministerio konserní