Sosten pa yuda empresanan ku nan Gastunan Operashonal Fiho (TVL) - Informashon tokante Gobièrnu di Kòrsou Bo opinion

Notisia

Sosten pa yuda empresanan ku nan Gastunan Operashonal Fiho (TVL)

Geplaatst op 29 December 2020 dor di Ministerio Desaroyo Ekonómiko

WILLEMSTAD – Minister di Desaroyo Ekonómiko, sr. Steven Martina ta anunsiá ku for di djaluna 4 di yanüari 2021 pa 4’or di atardi, empresanan por apliká pa un sosten di nan gastunan operashonal fiho. Banda di e areglo di NOW ku ta yuda empresanan mantené trahadó den servisio, e fasilidat di krédito pa empresa chikí i mediano i tambe e sosten pa empresario individual, ta bini un sosten èkstra pa empresanan di Kòrsou. E asina yamá TVL (Tegemoetkoming Vaste Lasten) ta yuda empresanan ku nan gastunan operashonal fiho. Empresanan ku tin trahadó i a sufri un pèrdida di entrada promedio di mas ku 25% den luna di yüli pa sèptèmber 2020, por bini na remarke pa e areglo akí. Por apliká te ku djaluna 11 di yanüari 2021 pa 4’or di atardi via e portal riba www.fondodisosten.org, òf via di mail ku un link pa empresanan ku ya tin aplikashon den e areglo di NOW.

Informashon di sosten pa gastunan operashonal fiho
E maneho di Gobièrnu ta dirigí riba sostené empresanan ku tabata saludabel pa nan por pasa dor di e krísis di COVID-19. Si tur e empresanan aki sera nan portanan òf bai fayit, lo bira mas difísil pa por rekuperá tur e aktividatnan ekonómiko i tur e kuponan di trabou ku lo bai pèrdí i trese esakinan bèk na e nivel ku nan tabata promé ku mart 2020.

Gastunan operashonal fiho ta gastunan ku ta sigui kore maske ku e empresa no tin entrada. Ta trata di gastunan manera entre otro hür, propiedat inmóbil, interes i pagonan di fiansa, seguro, pagonan di “lease” i abonado. Un sosten di e gastunan operashonal fiho lo hasi posibel pa e empresa por paga su kréditornan. Esaki ta yuda evitá un efekto di dominó, debí ku e empresa no por kumpli ku su debernan na otro empresanan manera entre otro seguro i banko ku ta pone na su turno ku e empresanan aki ta haña nan ku problema di likides. Pa empresanan di Kòrsou, tin un montante di NAf. 23,8 mion disponibel pa e sosten di gastunan operashonal fiho.

E sosten i su kondishonnan
Empresanan na Kòrsou, ku tabata registrá na SVB promé ku 28 febrüari 2020 i tin trahadó, lo por bini na remarke banda di NOW tambe pa e sosten di gastunan operashonal fiho basta nan tabatin un promedio di pèrdida di entrada di mas ku 25% den e di tres kuartal di e aña 2020. E empresanan ku pa motibu di konsekuensianan mara na e krísis di COVID-19, lo por bini na remarke pa un sosten insidental. E sosten ta basa riba:

  • Entrada di e di tres kuartal di 2020, kompará ku e entrada di mesun periodo den 2019; 
  • 32 porshento di gastunan operashonal fiho manera kalkulá pa CBS;  
  • Mínimo 30 porshento di supsidio di Gobièrnu pa e gastunan operashonal fiho.

E sosten por ta un montante mínimo di 750 florin te ku un montante máksimo di  150.000 florin pa empresa pa kuartal.

Ehekushon
E prosedura pa empresanan por apliká ta simpel. Empresanan ku ya e yega di apliká òf ta risibiendo sosten di NOW, lo risibí un invitashon via mail pa por apliká. Tur otro empresa por yena e aplikashon digital via di portal riba www.fondodisosten.org. Si tin kalke pregunta por lesa informashon di e areglo riba e wèpsait òf por manda un mail na e TVL Helpdesk na: tvl@fondodisosten.org.

Ministerio di Desaroyo Ekonómiko ta kontrolá tur e aplikashonnan i pagonan lo ser ehekutá dor di SVB. Kaminda ta nesesario lo tin un kolaborashon ku Ofisina di Impuesto i/òf Ontvanger pa hasi un kontrol adishonal leve. Tur empresa ku ta bini na remarke pa e sosten di gastunan operashonal fiho i ku ta kumpli ku tur kondishon pa ku “compliance’’ lo por risibí e supsidio riba nan kuenta di banko den un siman despues ku e periodo pa apliká sera (11 di yanüari 2021 pa 4’or di atardi).

Ku introdukshon di e sosten akí, Minister Martina i Gobièrnu di Kòrsou, ta spera di duna e empresanan un alivio èkstra. Esaki ta hopi agudo mirando efektonan di  e pandemia mundial i e impakto ku e sierto di e medidanan ku Gobièrnu a introdusí pa salbaguardiá salubridat públiko por tin riba nos empresanan.

Klek akí pa e presentashon durante e Konferensha di Prensa di djamars, 29 di desèmber 2020.

Ministerio konserní