Publiká riba 08 Sèptèmber 2020
Señora presidente, honorabel miembronan di parlamento,
Aña pasá, na okashon di apertura di aña parlamentario, nos a papia di un kredo ku nos tur mester tene na dje: ‘kai, lanta i sigui’, veerkracht, resilience. Mirando e tempunan di prueba i retonan grandi pa hinter komunidat di Kòrsou, mas ku nunka e kredo aki ta keda importante.
Na 2019 Gobièrnu a inisiá e trayekto di Strategia di Kresementu pa Kòrsou.
E meta prinsipal ta, pa traha huntu ku otro ministerionan di un manera integral; duna empuhe na desaroyo ekonómiko duradero; mehorá nos maneho finansiero; modernisá i fortifiká aparato públiko; stimulá desaroyo sosial duradero i halsa kalidat di enseñansa.
No opstante e esfuersonan aki, nos a klousura aña 2019 ku un kresementu ekonómiko negativo di -3,5%. Esaki un biaha mas ta suprayá e impakto ku sierto desaroyonan tin riba nos ekonomia lokal, por ehèmpel e krísis na Venezuela i e echo ku nos refineria momentaneamente no ta operashonal. Krísisnan ku ta revelá problemanan prolongá den nos sektor públiko, defisiensia den nos finansa públiko i tambe un struktura ekonómiko antikuá.
Aña 2020 a kuminsá ku optimismo ku e rekuperashon ekonómiko ku nos ta deseá lo a bira alkansabel. Turismo a mustra un kresementu fuerte na aña 2019, tabatin un perspektiva positivo den sektor di konstrukshon ku proyektonan di hotèl, apartamentu, i e speransa ku nos refineria lo ta operashonal atrobe, a vislumbrá!
Lamentablemente Kòrsou, meskos ku mundu henter, a keda konfrontá ku COVID-19. Ku akshon determiná, for di punto di bista di salubridat, nos komunidat a logra mantené e pandemia aki bou di kontrol. Sinembargo riba tereno sosial, ekonómiko i di finansa públiko, esaki a hiba nos den un situashon eksepshonal i sin presedente. COVID-19 a resultá di no ta simplemente un krísis di salubridat, e ta un krísis di humanidat.
Ku nos pais ta den un situashon prekario i ku nos retonan sosial ekonómiko ta grandi, ta un realidat. E kredo di “resilience” ta nesesario, awor mas ku nunka. Ademas nos ta eksperensiá aktualmente un kresementu di kasonan di kontagio lokal di COVID-19, loke por tin su reperkushon pa nos ekonomia, situashon sosial i bida manera nos konosé.
Sra. Presidente,
Pa logra rekuperashon duradero, nos tin mester di sosten. Manera ta konosí, Hulanda a yuda i a ofresé pa yuda na un manera mas struktural bou di algun kondishon. Un di e kondishonnan aki ta institushon di un ‘Caribische Hervormingsentiteit (CHE)’ pa medio di e Lei di Konsenso i tambe ehekushon di e asina yamá ‘landspakket’ ku ta kontené reformanan struktural.
Pa kumpli ku e kondishonnan di Hulanda pa por a risibí e sosten aki, Gobièrnu di Kòrsou a proponé un Programa di Rekuperashon i Reforma. E Programa aki ta forma e base pa e ‘landspakket’ ku Hulanda a proponé.
E áreanan di enfoke di e Programa ta lo siguiente:
E Programa di Rekuperashon i Reforma menshoná, lo bira e prioridat pa Gobièrnu pa e aña 2020 – 2021. E Programa ta duna e direkshon i prioridatnan di Gobièrnu pa e ministerionan kana pa yega na e meta di un Kòrsou duradero.
Desaroyo ekónomiko duradero
Ministerio di Desaroyo Ekonómiko a desaroyá diferente instrumento pa asina evitá ku nos ekonomia lo a resultá den un spiral negativo mas grandi. Tur esaki a keda stipulá den e pakete di ‘Fondo di Alivio’.
Prinsipalmente, e areglo di NOW pa doñonan di trabou tabata di sumo importansia, pero tambe e Fondo di Sosten pa empresarionan individual tabata krusial. Ademas a logra pa algun kompania den sektor privá otorgá un periodo di grasia pa fiansanan eksistente i ofresé fiansanan nobo na kondishonnan muchu mas faborabel. Ku e esfuersonan aki a logra sostené hopi empresa ku di otro forma lo a sera nan portanan.
Ministerio di Transporte, Tráfiko i Planifikashon Urbano tin un ròl importante pa desaroyo ekonómiko duradero di nos pais i pa kontribuí na kalidat di bida di tur siudadano. Pa menshoná algun: Planifikashon di espasio di bibienda; Seguridat den tráfiko; i tambe Transporte den tur su aspektonan, ku atenshon spesial pa konektividat aéreo. Mirando nos realidat i teniendo kuenta ku e kuadro finansiero i ekonómiko di nos pais, e enfoke ta riba mehorashon di e servisio na komunidat.
Ta bai sigui traha riba: Bibienda; Mobilidat; Proyektonan infrastruktural.
Den kuadro di desaroyo ekonómiko duradero, e Ministerio di Asuntunan General lo pone un enfoke pa logra modernisashon i kontinuidat di operashon di nos refineria i terminal na Bullenbaai. Lo krea i fasilitá aktividatnan ekonómiko nobo i duradero pa futuro generashon riba terenonan bou di maneho di Refineria di Kòrsou, ku bista riba un Horizonte Nobo. Esaki lo inkluí: un ‘living lab’,’ LPG terminal’, ‘green power plant’ i ‘water front development’.
Pa logra un sektor laboral dinámiko, Ministerio di Desaroyo Sosial, Labor i Bienestar lo atendé ku e dinámika di merkado laboral pa duna ekonomia di Kòrsou un impulso dor di entre otro:
No opstante e situashon difísil ku nos ta enfrentá, Kòrsou te ku awor a logra mantené un gran kantidat di kupo di trabou. Gobièrnu di Kòrsou a supsidiá 17.000 salario mensualmente durante e periodo di aprel te ku yüni. Tambe a logra sostené 3,000 empresarionan individual ku un supsidio di 1.353 florin pa luna i duna alivio na mas ku 1.600 hende ku a pèrdè trabou dor di e pandemia. Tambe a duna sosten den forma di karchi sosial ku un balor te máksimo 450 florin pa luna na esnan ku mas nesesidat den nos komunidat. Entre otro a duna karchi sosial na 2.300 hende ku a pèrdè trabou i na mas ku 7.800 kobradó di ònderstant.
Nos no a hasi esaki nos so; Hulanda a sostené nos den esaki i nos ta agradesido. Na e manera aki Gobièrnu ta sostené mas ku 30,000 famia. Gobièrnu di Kòrsou ta sigui hasi su máksimo esfuerso pa mas tantu posibel yuda esnan ku mester di yudansa.
Di gran importansia ta e echo ku nos mester stimulá sektornan ku mester krea kuponan di trabou èkstra. Awor nos mester traha riba un fondo di rekuperashon pa asina yuda empresanan salú krese i krea aktividatnan empresarial nobo. Pa esaki, Ministerio di Desaroyo Ekonómiko a desaroyá plannan di stimulashon pa diferente sektor i tambe desaroyo di tereno i áreanan.
E fondo di rekuperashon menshoná ta instrumental pa finansiamentu di e plannan pa guia nos na un desaroyo ekonómiko duradero, mantenshon di kuponan di trabou i pa krea kuponan di trabou nobo.
Sra. Presidente,
Finansa públiko sano
Un di e prioridatnan di Ministerio di Finansa ta pa realisá entrante promé di yanüari 2021 un organisashon di impuesto integrá ku ta konsistí di tur e prosesonan di “heffing”, “inning” i “controle”. Un servisio di impuesto integrá ta garantisá mihó servisio, maneho mas efisiente i rápido, ta evitá duplikashon di deklarashon i ta mehorá kalidat di deklarashon.
Integrashon di servisionan di impuesto ta garantisá alabes ku entradanan ku ta toka kaha di Gobièrnu ta keda realisá na tempu, i asina por kontribuí pa yega na un pais finansieramente mas stabil i sano.
Ademas Ministerio di Finansa ta sumamentu kontentu ku durante e periodo ku ta tras di lomba a logra atkerí personal kualifiká pa fortifiká tur ministerio ku “controllers”, “auditors” i direktornan finansiero i asina pone un paso firme den bon direkshon pa logra e promé deklarashon anual aprobá.
Un otro logro importante ta e echo ku nos pais a logra e status di “largely compliant” ku standart internashonal di OECD i asina salbaguardiá nos sektor finansiero i evitá ku Kòrsou a keda poné riba lista pretu.
Un sektor públiko ku ta efisiente i efektivo ta instrumental
Den e delaster añanan, Gobièrnu a sigui optimalisá su servisio i ofresé mas servisio online. Ku e situashon aktual esaki a bira ainda mas importante. Den e aña ku ta bin, Ministerio di Maneho di Gobernashon, Planifikashon i Servisio Públiko lo sigui riba e kaminda aki.
Den 2019/2020 a pone fundeshi pa konektá nos registronan básiko. Den 2021 lo sigui ku ampliashon rápido di e sistema. Konekshon di e registronan lo kondusí na mas efektividat i efisiensia den maneho, lo alsa kobramentu di impuesto i baha posibilidat di froude ku fondonan públiko. Mirando e digitalisashon planiá lo pone atenshon na e manera di warda informashon digital, seguridat di esaki i transparensia i akseso.
Importansia di e trayektonan aki ta ku nan lo hasi posibel pa Gobièrnu por funshoná ku ménos empleado na momentu ku próksimamente un kantidat di empleado públiko hasi uso di e posibilidat pa bai ku penshun trempan.
E situashon aktual i e bahada di e kantidat di empleado públiko ta hasi nesesario pa adaptá e organisashon di Gobièrnu i introdusí un manera nobo pa nos traha huntu ku nos personal pa por kumpli ku e eksigensianan di nos pueblo. Un Gobièrnu fuerte ta dependé di un empleado públiko fuerte.
Ministerio Asuntunan General lo sigui traha riba halsa efisiensia, efektividat i optimalisá sosten na otro ministerionan. Entre otro, e Departamento Hurídiko i Legislashon (WJZ) lo pone un enfoke riba edukashon kontinuo, modernisashon di prosesonan i halsa kalidat di legislashon relashoná ku programa di reforma. Direktorado di Komunikashon i Informashon (C&V) lo sigui ku implementashon di plan stratégiko di komunikashon 2019-2023 (interno i eksterno). I Direktorado pa Kòntròl di Riesgo i Maneho di Kalamidat (DRR) ta kontinuá ku evaluashon i aktualisashon di profil di riesgo di Kòrsou i plannan di kontigensia/kalamidat i instituí un sentro di operashon di emergensia konforme standardnan moderno (EOC).
Ministerio di Hustisia lo haña sosten di SOAB pa hisa efektividat di vários sektor. Kuerpo Polisial Kòrsou lo intensifiká e trayekto pa halsa funshonamentu di su Maneho Interno. Toelatingsorganisatie tambe lo risibí e refuerso aki i mas personal pa yega na un maneho (i ehekushon) nobo. Ademas, lo kontinuá huntu ku sindikatonan i parlamento, pa finalisá e kuadro legal di polis (Politieregeling i Besluit Rechtspositie) den e próksimo 6 luna.
Tambe Ministerio di Hustisia a reservá finansa pa por invertí den kontinuashon di trayekto di resosialisashon den SDKK i JJIC p’asina esnan ku a faya den pasado, por tin mas espektativa pa un mihó futuro.
Sektor di Salubridat
E Ministerio di Salú, Medioambiente i Naturalesa ku tin e ròl krusial pa salbaguardiá bienestar di salu den sentido mas amplio di palabra pa kada un siudadano, lo sigui na un manera inkansabel i determiná.
Na fin di 2019 despues di un periodo bastante largu, porfin a logra selebrá apertura di nos Hospital Nobo den Kaya Grandi di Otrabanda kaminda ta ofresé na nos siudadanía un kuido di kalidat haltu ku algun di e fasilidatnan di kuido mas avansá den Karibe.
Na e momento aki e Ministerio di Salú, Medioambiente i Naturalesa, ta konfrontando konsekuensianan serio di e pandemia di Covid-19 ku a impaktá tur sektor i kada famia den nos komunidat. E Ministerio ta determiná pa sigui riba e kaminda pa kontené e vírus na Kòrsou. Huntu ku sosten di ekspertonan lokal i internashonal lo traha pa logra tene e situashon di COVID-19 bou di kòntròl, garantisá un bon kuido i evitá un plamamentu di e Coronavírus ainda mas serio den nos komunidat.
Adishonalmente Ministerio di Salú, Medioambiente i Naturalesa a traha riba un struktura di reforma di gastunan den kuido di salu di moda ku e kuido ta keda manehabel. Ya parsialmente a yega na un formulá pa kontené e gastunan den e sektor di médiko i spesialistanan. E reforma aki lo enserá medidanan di protekshon tambe pa e siudadano i pa garantisá ku e kuido médiko lo tuma lugá solamente dor di profeshonalnan ku ta kalifiká.
Den e añanan nos dilanti , nos lo sigui perfekshoná loke ta bon pa garantisá un nivel adekuá, kuido aksesibel pa un i tur, ku ta finansieramente akseptabel i pagabel, tantu pa Gobièrnu komo pa e siudadano di Kòrsou.
Esaki ta rekerí ku mester: Fortalesé e sistema di seguro sosial
Ministerio di Desaroyo Sosial, Labor i Bienestar ta sigui implementá e medidanan di sosten pa yuda esnan den nesesidat ya ku ta premirá ku e konsekuensianan ekonómiko i sosial, relashoná ku e pandemia di COVID-19, lo no disparsé e aña aki.
E aktividatnan ku e Ministerio di Desaroyo Sosial, Labor i Bienestar lo sigui desplegá relashoná ku nesesidatnan agudo di nos pueblo ta entre otro:
Sra.Presidente,
Desaroyo sosial duradero
Un di e retonan di mas grandi ta pa enfrentá e konsekuensianan sosial relashoná ku e impakto di COVID -19. Pa por kuida nos salú, mester a tuma medidanan drástiko ku ya kaba a afektá e situashon ekonómiko. Pa sostené nos siudadanonan i kuida nos komunidat, Ministerio di Desaroyo Sosial, Labor i Bienestar lo kontinuá implementashon di e Sociale Ontwikkeling Agènda Curaçao (SOAC). Mirando e krísis aktual a revisá sierto prioridat. E prioridatnan di mas agudo di e periodo aki ta:
Na mes un momento, Ministerio di Desaroyo Sosial, Labor i Bienestar ta trahando riba prosesonan pa mehorá e bida di tur siudadano na Kòrsou. Esaki ta inkluí:
Ministerio di Asuntunan General lo sigui fasilitá ehekushon di proyektonan bou di enkargo di Reda Sosial, den kuadro di Agènda pa Desaroyo Sosial di Kòrsou, ku meta pa redusí pobresa i desigualdat sosial, inkluyendo drechamentu di kas (proyekto di ‘quick fix’), sentronan di bario, fasilidat di rekreo i promové ehersisio den bario.
Sifranan di e Büró Sentral di Statistik ta mustra ku tin un nesesidat grandi di bibienda riba nos pais. Den e kuadro aki e Ministerio di Transporte, Tráfiko i Planifikashon Urbano su maneho ta fundá riba tres pilar:
Ministerio di Hustisia tambe tin un ròl importante pa protehá desaroyo sosial na Kòrsou. E trabou di direktornan di bario (‘buurtregisseurs’) ta mas importante ku nunka i e koperashon ku direktivanan di skol den kuadro di prevenshon i seguridat na skolnan tambe ta imperativo.
Riba tereno di maltrato, abuso doméstiko i abuso di menornan di edat, a finalisá e trayekto di kambio di e strategia interno. Lo trata kasonan penal konserní ku diligensia i konforme eksigensianan internashonal.
Importante pa ku prevenshon i resosialisashon, ta e fushon di Gezinsvoogdij Instelling Curaçao (GVI), Slachtofferhulp, Voogdijraad i Ambulante Justititiele Jeugdzorg Curaçao (AJJC), p’asina brinda mihó servisio i logra efikasia.
E trayekto pa yega na e lei ku ta regla e posishon di “Vermoedelijke verwekker” tambe mester terminá e aña aki. Koperashon ku Universidat di Kòrsou pa duna mas balor na e ròl di e tata den bida di yunan, ta hañando forma.
I mas ku klaro, akshonnan ku ta regardá trafikashon di hende i posishon di arma ilegal lo kontinuá ku diligensia.
Di sumo importansia, ta e enfoke riba: Enseñansa di kalidat 
Basá riba e vishon, ‘formashon kompletu, komunidat kompletu’, Ministerio di Enseñansa, Siensia, Kultura i Deporte a ratifiká na yüli 2020 un Agènda di Enseñansa 2020-2022, trahá huntu ku stakeholders den komunidat.
E Agènda lo tin 4 área di enfoke:
Den lunanan benidero lo implementá diferente proyekto di prioridat, entre otro:
Pronto lo introdusí un maneho nobo di kultura pa un transformashon duradero di e sektor kultural i artístiko, kaminda lo invertí mas den programanan pa desaroyo di kultura i arte p’asina sostené avanse riba tereno kultural i artístiko den tur aspekto, tantu edukativo, ekonómiko, arte i hopi mas. Den luna di sèptèmber lo traspasá maneho di mas ku 160 terenonan i fasilidatnan deportivo den man di organisashonnan aktivo ku lo pèrkurá pa mihó uso, maneho i mantenshon di e terenonan na benefisio di bario, hubentut i deporte.
Señora Presidente, honorabel miembronan di parlamento,
Kòrsou ta konfrontando vários reto, algun di nan inesperá manera e pandemia global di Coronavírus (COVID-19). Gobièrnu di Kòrsou ta rekonosé ku nos tin ku sigui pa un transformashon aselerá, entre otro riba terenonan ekonómiko, sosial, fiskal i di enseñansa.
Gobièrnu di Kòrsou ta trahando duru riba esaki, pero pa ehekutá e kambionan aki i manehá e impakto di e krísis di COVID-19, mester di rekursonan finansiero i asistensia tékniko. Ta pa e motibu aki nos a aserká Hulanda komo partner den Reino pa duna un man.
Hulanda a sostené ekstensivamente i ta disponibel pa sigui yuda. Den kuadro di e krísis di COVID-19 a duna asistensia den forma di material médiko, rekursonan adishonal pa amplia kapasidat di kuido i asistensia di Defensa pa warda frontera. Tambe Hulanda a otorgá fiansa pa kubri défisit di likides kousá pa e krísis i pa Gobièrnu por duna sosten na empresa i personanan ku ta traha riba nan mes, alabes pa mantené kuponan di trabou.
Ta konosí ku Hulanda a pone un kantidat di kondishon na e di dos i di tres transh di e fiansa aki. E di tres transh a trese kuné un obligashon adishonal ku ta inkluí e ‘Caribische Hervormingsentiteit’ ankrá den un Lei di Konsenso ku a lanta basta resistensia, tambe den Parlamento.
Gobièrnu no a bai di akuerdo ku e proposishon di Hulanda risibí riba 6 di yüli último, pero Gobièrnu a keda buska oportunidat pa dialogá e propósito aki huntu ku Hulanda. Diálogo ta nifiká ku mester bin kompromiso entre e partidonan, pero tambe ku ta respetá kada partner su derechinan i prosesonan demokrátiko.
Diálogo i akuerdo ta alabes un eksigensia fundamental den nos Statüt, pa paisnan komo partnernan igual den Reino yega na konsenso i kolaborashon ora ta trata un Lei di konsenso. Den e spiritu aki, Gobièrnu di Kòrsou lo keda na mesa ku Hulanda pa buska un solushon, mirando e nesesidat urgente den nos komunidat: esta pa logra kambia kontrakshon ekonómiko den un kresementu ekonómiko; pa evitá mas desempleo i krea trabou; pa duna sosten na esnan mas vulnerabel i alabes yuda nan para riba nan propio pia; i pa invertí den nos infrastruktura, barionan, skolnan i sektornan di kuido.
E bishita di Sekretario di Estado, sr. Knops tabata un parti di e kombersashonnan aki. Nos a logra un apertura chikí i nos lo hasi uso di e oportunidat aki. Ta di e manera aki so nos por kontinuá pa sigui desaroyá un relashon di kolaborashon duradero den Reino na benefisio di nos komunidat.
Nos komunidat, nos ekonomia i mas importante, nos hendenan ta kargando ku e konsekuensianan pisá di e krísisnan. Kòrsou ta den tempu difísil i insigur. Gobièrnu di Kòrsou ta konfrontá esaki ku urgensia, seriedat, i responsabilidat.
E respuesta i rekuperashon mester pone énfasis riba konstruí Kòrsou mihó. Trahando riba rekuperashon i reforma, Gobièrnu lo traha pa krea un ekonomia stabil i fuerte sentrá riba persona, ku ta produsí trabou pa tur, i ku lo permití bienestar pa tur. Esaki ke men ku nos ekonomia, nos sistema di edukashon i nos infrastruktura mester reflehá esaki. Nos no por simplemente bai bèk na manera kos tabata bai. Pa nos por bai dilanti, mester reformá i transformá.
Pa hasi esaki, Gobièrnu tin mester di nos siudadanonan pa trese inovashon, speransa i unidat. Durante e periodo di krísis aki, nos por a wak kon nos a uni. Tur hende a bini huntu pa yuda, tantu ministernan i empleadonan públiko, organisashonnan privá i sosial i tambe boluntarionan.
Den tempunan di prueba grandi, ta un pueblo su abilidat di lanta bèk, un komunidat su abilidat di bini huntu, mara na otro i sostené otro, lo ta e motor pa surpasá i bai dilanti.
Komo komunidat nos por hopi. A bira tempu pa nos tin mas konfiansa den nos mes. Laga nos intensifiká i fortalesé e solidaridat i kolaborashon den e momento di desafio enorme aki. Ban Konstruí Mihó i Ban ta mihó den Konstruí nos nashon.
Señora Presidente, honorabel miembronan di parlamento,
Fiha atenshon na e proklamashon den preámbulo di Areglo di Estado di Kòrsou;
kaminda E humilde i honrado Pueblo di Kòrsou, despues di proklamá tur su derechonan fundamental komo pueblo i di nos estado di derecho demokrátiko komo pais; ta finalisá ku e proklamashon di fe: esta,
“…Ku nos fe den Dios nos lo gosa di Su protekshon, pasobra Felis ta e pueblo ku Su Dios ta Señor.”
I tambe e promesa, esta;
“Nos lo pone nos forsa huntu, i den igualdat i den pas sirbi nos Pais ku Amor”.
Dios ta Bendishoná Kòrsou i Su pueblo!
Danki.
