Bo opinion

Notisia

Sr. Dwigno Puriel enkargá komo hefe interino temporal di Servisio pa Obra Públiko

Geplaatst op 23 January 2019 dor di Ministerio Tráfiko, Transporte i Planifikashon Urbano

Willemstad – Resientemente, Konseho di Minister a bai di akuerdo ku e proposishon di Minister Jesus-Leito pa enkargá Sr. Dwigno Puriel, Sekretario General di Ministerio di Tráfiko, Transporte i Planifikashon Urbano (VVRP), temporalmente ku e tarea di hefe interino di Servisio pa Obra Públiko.

Despues ku Sr. Mike Willem a hala bèk su disponibilidat di bira hefe interino di OW na desèmber 2018, a presentá e reto pa wak kon ta atendé ku e funshon a korto plaso pa garantisá ku e trayekto di restrukturashon di e servisio ta sigui kana ku éksito. Despues di e deliberá ku tim di maneho di e ministerio huntu ku e kompania KPMG, a disidí pa Sr. Dwigno Puriel hasi esaki temporalmente.

E promé enkargo ta pa tene e konsultanan interno i eksterno pa tèrminá e plan stratégiko di  OW pa 2019 – 2021, ku aworakí ainda ta den konsepto, ku lo ta e fundeshi pa tur trabou ku mester tuma lugá. Tambe esaki lo habri kaminda pa e implementashon di e trayekto di restrukturashon. Di e forma aki, OW lo traha den un forma nobo i komunidat lo por nota esaki.

Tambe sr. Puriel lo mester atendé ku e trabounan diario di OW i presentá a korto plaso na minister e plan di trabou pa loke ta 2019.

Riba djabièrnè 18 di yanüari tabatin un seshon di informashon na OW kaminda a duna mas informashon di e desishon aki i kiko esaki lo enserá eksaktamente i tambe a deliberá riba e plan stratégiko menshoná

Esaki ta sigur un reto nobo i Sr. Puriel ta spera di por konta ku sosten di trahadónan i komunidat en general.

Ministerio konserní