Publiká riba 29 Mart 2019
Willemstad – Minister Zita Jesus-Leito huntu ku Servisio pa Planifikashon Urbano (ROP) ta anunsiá ku entrante 1 di aprel 2019, ROP tin un direktor interino nobo. E direktor nobo ta señor ir. Chesley Rach.
E direktor interino nobo lo ta enkargá ku maneho di ROP, i lo dirigí e servisio te ku fin di 2019. Durante di e periodo aki e lo asistí tambe ku e trayekto pa atraé un direktor permanente pa e servisio. E direktor interino lo traha huntu ku e tim di maneho di ROP pa guia e organisashon.
Sr. Rach tin un preparashon akadémiko komo ‘stedenbouwkundig ingenieur’ na Technische Universiteit Delft. Den pasado sr. Rach a laborá pa 10 aña na DROV, komo hefe di e Departamento di Planologia i tabata fungi komo direktor interino. For di aña 1987 el a laborá na Hulanda, i ta un eksperto den planologia ku mas di 30 aña di eksperensia den sektor públiko di Hulanda. E tabata entre otro ‘stadsdeelsecretaris’ di gemeente Amsterdam na Zuidoost i a dirigí diferente trayekto di kambio, ku ta hustamente e tipo di trayekto ku aworakí ROP, ku sosten di SOAB, ta kanando.
Den kuadro di optimalisashon di ROP, i mirando ku e kontrakt di Sra. Cathline Cecilia ta terminá dia 31 di mart 2019, Minister Jesus-Leito, huntu ku Tim di maneho di Ministerio di Tráfiko, Transporte i Planifikashon Urbano, a skohe pa Sr. Chesley Rach fungi komo direktor interino nobo. Durante di e trayekto a enfatisá riba e nesesidat pa yena e funshon di direktor permanente di ROP, ku ta vakante.
Dor di yena e funshon ku un direktor interino, a logra un punto importante den e trayekto di optimalisashon di ROP. E siguiente stap ta pa sigui traha pa logra e metanan stratégiko pa duna mihó servisio na komunidat. Esakinan ta entre otro maneho efisiente, lei nobo i adaptá, un plan di kapasitashon di personal, i diferente proseso i teknologia moderno.
Minister Jesus-Leito ta deseá Sr. Rach i ROP éksito pa kaba e trayekto importante aki pa Pais Kòrsou.
Pa tur informashon i desaroyo general di Servisio pa Planifikashon Urbano por bishita e wèpsait www.vvrp.cw, Facebook página MinisterieVVRP i Instagram MinisterieVVRP.
