Publiká riba 06 Yüli 2018
Invershon máksimo den nos enseñansa, edukashon i formashon, ta forma parti integral di e plan maneho di Gabinete Rhuggenaath. Segun e Akuerdo di Gobernashon 2017-2021 gobièrnu su vishon ta pa krea oportunidat pa kada siudadano, espeshalmente nos hóbennan, por desaroyá nan abilidat i talentonan.
Den kuadro di esaki Ministerio di Enseñansa, Siensia, Kultura i Deporte (ESKD) na komienso di aña eskolar 2017-2018 a duna diferente hóben e posibilidat pa kore stazje denter di e ministerio. Awor na final di e aña eskolar, Ministerio di ESKD ku hopi orguyo ta anunsiá ku 3 hóben di University of the Dutch Caribbean (UDC) a finalisá nan periodo di stazje i estudio ku gran éksito.
E resultadonan ta keda usá pa sigui fortifiká maneho riba e terenonan ariba menshoná.Ministerio di ESKD ta kontentu ku e studiantenan a hasi uso di e oportunidat pa nan sigui desaroyá nan mes i ta desea kada unu hopi éksito ku e siguiente fase di nan desaroyo.
Riba potrèt por mira e stazjèrnan ta hasi entrega di nan tésis serka Minister Enseñansa, Siensia, Kultura i Deporte, sra. Marilyn Alcalá-Wallé.