Entrante 1 di yüni 2016 tur usuario na Kòrsou ku risibí e desishon riba nan petishon (beschikking) tin ku akudí na Servisio di Atmishon personalmente pa risibí nan título di estadia (verblijfstitel). E interesado tin ku identifiká su mes segun e lei di identifikashon (identificatieplicht) pa e por risibí su título ku ta duné e derecho di por permanesé riba nos pais. E título ta bai den forma di un stèmpel den pasport te na momentu ku introdusí e título den forma di un pas of karnèt (vreemdelingenpas) dia 1 di òktober próksimo. E pas aki ta bira e título di estadia i e lo tin un balides máksimo di 5 aña.
Esaki ta un di e kambionan ku Servisio di Atmishon konforme deseo di Ministerio di Hustisia ta bai introdusí próksimamente. E kambionan ta kuadra ku e vishon aktual di Gobièrnu i di Minister di Hustisia pa loke ta trata atmishon di estranheronan. Pues su ehekushon ta benefisiá tantu e estranhero/usuario komo nos pais. Den e maneho nobo a inkorporá tambe hurisprudensia vigente.
Aparte di e separashon di e desishon for di e título di residensia, tin un kambio den e prosesamentu di e desishon. Segun LAR (Landsverordening Administratieve Rechtspraak) e interesado por haña e desishon riba su petishon dor di distribushon (uitreiking) òf via pòst (verzending). Entrante 1 di yüni 2016 e interesado por skohe pa risibí su desishon riba su petishon via email tambe. E kambio aki ta ventahoso relashoná ku e término ku e interesado tin den kaso ku e ta desea na apelá e desishon. Ku esaki Serviso di Atmishon no ta entregá e asina yamá karta di notifikashon òf oproepingsbrief mas. E notifikashon aki ta bai bira parti di e desishon riba e petishon. Esaki ta nifiká ku e ‘oproepingsbrief’ i e ‘beschikking’ lo ta den un solo dokumento.
Ku introdukshon di e kambionan aki Servisio di Atmishon ta bai optimalisá su servisio na e usuario. Ademas e ta proveé mas fasilidat pa prosesá e petishonnan. Durante e seshonnan di informashon ku e servisio ta bai organisá, ta bai splika e kambionan den un forma mas simplifiká na e usuario. Ora ta asina leu e servisio ta sigui informá i tambe duna mas detaye di e seshonnan aki via su página di facebook Toelatingsorganisatie Curaçao – Inmigrashon Kòrsou i website di Gobièrnu di Kòrsou www.www.gobiernu.cw.
