Stipulashon Dekreto Nashonal na fabor di proyekto HNO importante pa Kòrsou - Informashon tokante Gobièrnu di Kòrsou Bo opinion

Notisia

Stipulashon Dekreto Nashonal na fabor di proyekto HNO importante pa Kòrsou

Geplaatst op 19 July 2019 dor di Ministerio Salubridat Públiko, Medio Ambiente i Naturalesa

WILLEMSTAD – Konseho di Minister di Reino tin ku tuma un desishon si tin ku eliminá e Dekreto Nashonal ku Gobièrnu di Kòrsou a presentá na Gobernador. Ta trata aki di un Dekreto Nashonal ku Gobernador a keda sin stipulá a base di artíkulo 21 di e Reglamentu di Gobernador di Kòrsou. E Dekreto Nashonal ta forma parti di e Akuerdo di liñanan grandi (Hoofdlijnenakkoord) i e sakamentu di èrfpagt enkuanto e fiansa adishonal relashoná ku e proyekto Hòspital Nobo Otrobanda (HNO). Gobernador den e kaso akí ta di opinion ku e dekreto nashonal ta kontra di e interesnan ku ta kai bou di asuntu di Reino i Lei di supervishon finansiero ku tin di atendé i garantisá esaki. A konsekuensia, segun prosedura legal, Gobernador a notifiká Rei komo persona na kabes di Gobièrnu di Reino di e suseso akí. 

E prosedura ta enserá ku Konseho di Minister di Reino (RMR) ta duna oido na Konseho di Estado di Reino (Raad van State), promé ku tuma un desishon. Despues di a konsultá ku Konseho di Estado di Reino, lo determiná pa medio di un Dekreto di Reino, si Gobernador na su turno por stipulá e Dekreto Nashonal ainda ya ku esaki no tabata kontra di e interesnan ariba menshoná. Si akaso disidí ku e dekreto tòg ta kontra, lo anunsiá esaki den e korant di publikashon ofisial.

Gobièrnu di Kòrsou komo reakshon a duna su opinion na Konseho di Minister di Reino, kaminda a indiká ku hòspital nobo no ta forma parti di e sektor kolektivo i p’esei no ta kai bou di Lei di supervishon finansiero. For di komienso Gobièrnu a duna su opinion tokante struktura di entidatnan di HNO i e posibilidat pa un fiansa privá. A stipulá esaki tambe den un ‘Memorandum of Understanding’ di 2013. Lo informá Konseho di Estado di Reino tambe di Gobièrnu su opinion. Gobièrnu di Kòrsou ta enfatisá ku sirbi interes di Kòrsou, entre otro ofresiendo un kuido di hòspital apropiá, ta rekerí tumamentu di e fiansa. 

Adishonalmente Gobièrnu ta indiká ku mester evitá gastunan dòbel. E tipo di gastunan akí ta resultá for di un banda, e mantenshon di e hòspital eksistente (Sehos) i di e otro banda mantenshon di un hòspital ku no ta operashonal ainda (CMC), ku ta resultá den gastunan i kleim adishonal.  

Gobièrnu di Kòrsou ta keda en espera i wak kon e prosedura ta sigui kana i ta konfia riba un bon resultado na final.

Ministerio konserní