Notisia

Studiante den Derecho Fiskal i Ekonomia a presentá su tesis di graduashon
“Evaluashon di nos regulashon fiskal pa komersio elektróniko i Ekonomia Digital na regulashon internashonal”

Willemstad, Djabièrnè 16 di yüni 2017 Rowan-John Martina, kende resientemente a finalisá su estudio eksitosamente di bachieratu den Derecho Fiskal i Ekonomia na Universidat di Kòrsou,  a hasi un bishita serka Minister di Finansa señor Kenneth Gijsbertha.

Durante di e enkuentro aki e eks studiante di Universidat di Kòrsou a presentá su tésis di graduashon, ku tin komo título ‘Evaluashon di nos regulashon fiskal pa komersio elektróniko i Ekonomia Digital na regulashon internashonal di entre otro Organisashon pa koperashon Ekonómiko i Desaroyo (OECD) i alabes a entregá e tesis na minister.

Komersio elektróniko (E-commerce), konsistiendo di hasi kompra online, servisio digital, tienda riba web, subasta riba internet i tur otro tipo di negoshi i servisio generalmente hasí kontra pago ku tarheta di krédito, ta forma parti di ekonomia digital ku ta kresiendo rápidamente. Esaki ta tresé pa Kòrsou i tur otro pais na mundu hopi reto fiskal.

Na fin di su presentashon kòrtiku Rowan-John a duná su rekomendashonnan:

• Modernisashon di e regulashon fiskal i hurídiko antikuá;
• Hasi posibel solushonnan di pago online konfiabel atrabes di bankonan lokal;
• Atendé retonan logístiko tantu den importashon komo den eksportashon den ekonomia digital.

 Por konklui ku:

• Un diversidat di adaptashon ta nesesario pa mehorá e kuadro di komersio elektróniko i pon’e kumplí ku normanan internashonal i regulashon;
• E regulashon fiskal  pa loke ta trata komersio elektróniko no ta kuadra ku e tempu aki i ku tin mester di un modernisashon pronto;
• Introdukshon di adaptashon den kobransa fiskal ku ta den konkordansia ku eksigensha di e BEPS-rapòrt i puntonan di akshon. BEPS ta para pa Base Erosion & Profit Shifting (Eroshon di base i kambio de ganashi).

E studiante di Universidat di Kòrsou ku lo risibí su diploma na fin di  e luna aki a haña e sifra 9 pa su tesis di graduashon.

Durante su bishita e studiante tabata den kompania di e direktor di e programa di FRE, señor mr.  Rashid Sammy i su supervisor di tesis, señor drs. Emauro Scoop.

Riba pòrtrèt: Despues di a risibí un ehemplar di e tesis, minister  di Finansa Kenneth Gijsberthaa entregá na Rowan-John Martina e eksperto fiskal hoben un regalo na su nòmber i di su gabinete.

Riba pòrtrèt d.r.p.d.:Shaerelin Valks BSc, kolaborador di Gabinete di Minister, Minister di Finansa Kenneth Gijsbertha, Rowan-John Martina, fiskalista, drs. Emauro Scoop, kolaborador di Gabinete di Minister i alabes supervisor di e tesis,  Saskia Stjeward LL.M. hefe di Sekshon di Impuesto Direkto, Percival Simmons LL.M. Hefe di Sekshon di Asuntunan Fiskal Internashonal i mr.  Rashid Sammy direktor di e programa di e estudio Fiscaal Recht en Economie. 

MAS NOTISIA

Ministerio konserní: Finansa