Notisia

Ministerio di Enseñansa, Siensia, Kultura i Deporte (ESKD) ta hasiendo su máksimo esfuerso pa informá tantu komunidat, mayornan i tur studiante tokante di aspektonan importante pa ku kontinuashon di nan estudio den eksterior.

Resientemente embahada di Canada, a saka un komunikado ofisial anunsiando ku e prosedura pa aplikashon di dokumentonan di imigrashon pa Canada ta bai kambia entrante dia 31 di yüli 2018. Esaki ta nifiká ku tur persona ku ta deseá di biaha pa Canada mester regla su dokumentonan di imigrashon segun un otro prosedura. Ora ta apliká pa dokumentonan di imigrashon tambe mester entregá biometria (hueya digital i pasfoto) personalmente na un di e sentronan  mas serkano, di e asina yamá Visa Application Centers situá na e siguiente paisnan:

• Port of Spain, Trinidad and Tobago
• Santo Domingo, Republika Dominikana
• Bogota, Colombia
• Caracas, Venezuela

Na e momentunan aki ahinda no tin un representante di Canada na Kòrsou. Tur studiante ku ta deseá di bai studia na Canada mester apliká pa un pèrmit di estadia di studiante, “study permit”. Esaki ta konta pa esnan ku a apliká via di Stichting Studiefinanciering Curaçao (SSC) i tambe pa esnan ku ta bai studia na Canada independientemente (freemovers). Si kada studiante biaha riba nan mes pa un di e sentronan apuntá, esaki lo trese èkstra gastunan i tambe riesgonan di seguridat kuné. Tambe ta importante pa e studiantenan regla nan dokumentonan di biahe na tempu mirando e echo ku nan fecha di biaha pa bai studia ta aserkando.

Despues di kordinashon entre Ministerio di Asuntunan General y Ministerio di Enseñansa, Siensia, Kultura i Deporte (ESKD) i outoridatnan di Canada, a yega na e siguiente prosedura pa e studiantenan di Kòrsou, kual ta rekerí su debido atenshon.

E studiantenan lokal NO mester biaha pa akudí na un di e Visa Application Centers, basta nan sigui e siguiente prosedura:

• Studiantenan lokal NO mester apliká pa un visa pa bai Canada.
• Studiantenan lokal mester apliká pa un pèrmit di estadia pa studiante, “study permit” (SP) i tambe un formulario “Electronic Travel Authorization” (ETA).
• E petishon pa un SP ta wòrdu kompletá online. Si e SP keda aprobá, e studiante ta risibí un konfirmashon via e-mail den forma di un “Letter of Introduction”. Ora e SP keda aprobá, outomátikamente e formulario di ETA tambe ta keda otorgá. Na yegada na Canada e studiante mester presentá e “Letter of Introduction” na departamentu di imigrashon. Departamentu di imigrashon na su turno lo traha e SP i entregá esaki na e studiante.
• Studiantenan tin ku hasi nan petishon online, preferibelmente mas lihé ku ta posibel, pa asina sigurá ku nan ta regla nan dokumentonan di imigrashon na tempu (promé ku e fecha ku nan mester biaha).
• Studiantenan ku ta bai studia na Canada pa un periodo mas largu ku 6 luna mester apliká pa un pèrmit di estadia pa studiante via di e siguiente link: www.canada.ca/en/immigration-refugees-citizenship/services/study-canada/study-pèrmit/eligibility.html
• Petishonnan ku keda entregá promé ku 31 di yüli 2018, NO mester di entregá biometria.
• Petishonnan ku wòrdu entregá despues di dia 31 di yüli 2018, SI mester entregá nan biometria na un di e VISA Application Centers ariba menshoná.

Ta hopi importante pa tur studiante regla nan petishon pa pèrmit mas lihé ku ta posibel, i no laga esaki pa último momentu, kual ta dia 31 di yüli 2018. Studiantenan ku NO hasi nan petishon na tempu, ta haña nan mes obligá pa biaha pa akudí na un di e VISA Application Centers ariba meshoná.

Ministerio di ESKD ta urgi tur studiante pa tuma bon nota di e informashon aki. Tur studiante ku ta deseá di risibí yudansa den e proseso ariba menshoná of ku mester di mas informashon por akudí na SSC. SSC ta habrí di djaluna pa djabièrne for di 8:00or – 16:00or non-stòp.

Persona di kontakto na Stichting Studiefinanciering Curaçao:

Sr. Gerineldo Job

Departamentu di Aplikashon

Telefoon: 5999-465 8480

Email: info@ssc.cw

MAS NOTISIA

Ministerio konserní: Enseñansa, Siensia, Kultura & Deporte