Publiká riba 28 Desèmber 2018
Willemstad – Entrante 1 yanüari 2019 e suèldu mínimo pa ora na Kòrsou lo keda oumentá a konsekuensia di indeksashon basá riba oumento di preisnan pa konsumidó entre ougùstùs 2017 i ougùstùs 2018. Suèldu mínimo pa ora ta konta pa tur trahadó, inkluyendo personal doméstiko. E salario mínimo, ku eksepshon di trahadónan bou di 21 i personal doméstiko, ta NAf. 9,37 pa ora, entrante 1 di yanüari 2019. E suma trahando 40 ora pa siman ta bira NAf 374,80. E suma pa luna trahando 40 ora pa siman mester bira NAf 1.622,88.
Pa personal doméstiko ku ta biba na kas di e dunadó di trabou, por dedusí un montante te ku un máksimo di NAf 300,- (tres shen florin) pa luna for di e suèldu mínimo relashoná ku gastu di kuminda i pa biba den e mesun kas.
Trahadónan for 16 aña di edat pero ku no a alkansá e edat di 21 aña, tin derecho riba un suèldo mínimo ku ta rasonabel kompará ku e suèldo mínimo pa ora ku ta vigente. E trahadó hóben di entre 17 /16 aña mester haña NAf 6,09 pa ora, di 18 aña mester haña NAf 7,03 pa ora, di 19 aña di edad mester haña 7,96 pa ora i di 20 aña di edad mester haña 8,43 pa ora.
