Notisia

Summa College ta kolaborando ku nos islanan pa fortifiká nos sektor di Kuido i Bienestar.

Willemstad –  Resientemente minister di Enseñansa, Siensia, Kultura i Deporte (ESKD) sr. Sithree van Heydoorn a risibí representantenan di Summa MBO College di Eindhoven, Hulanda. Sra. Karin Swijter i sr. Martijn van der Linden di e instituto a kòmbersá ku minister i kolaboradónan di maneho di ministerio pa sigui traha huntu pa adelanto i den koperashon. Summa College ta forma parti di e konsorsio di MBO na Hulanda ku ta aportá na e sektor di Kuido i Bienestar den Karibe.

Durante e promé simannan di febrüari Summa College tabata di bishita na Aruba, Boneiru i Kòrsou. Summa College ta un instituto ku ta ofresé, entre otro, estudionan den kuido. Aktualmente e instituto akí, ta dunando su kolaborashon na hospitalnan na Aruba, Boneiru i Kòrsou pa halsa konosementu di personal. Esaki ta riba terenonan spesialisá, manera estudionan di sterilisashon di instrumento pa, entre otro, sala di operashon. Den estrecho kolaborashon ku Eligia Martier SBO, un instituto di SBO di Stichting R.K. Centraal Schoolbestuur, ta trahando pa fortifiká kalidat di enseñansa den e sektor di Kuido i Bienestar di nos pais.

Adishonalmente, por indiká ku sra. Swijter i sr. van der Linden tin laso estrecho ku e instituto di enfermeria IFE aki na Kòrsou, EPI di Aruba i MBO Boneiru. Ta orientando riba posibilidatnan pa e tres paisnan akí traha huntu pa e estudionan di asistente di dòkter i asistente di botikario konforme programanan inovativo i moderno. Ministerio di ESKD por indiká ku ya a dal e promé pasonan kaba pa realisashon di e trayekto akí den futuro.

Minister di ESKD sr. Sithree van Heydoorn a keda kontentu ku e bishita i ta sigui traha na bienestar di nos enseñansa huntu ku su tim di maneho di ministerio.

—

KOMUNIKASHON

**Riba e potrètnan por tuma nota di e bishita di Summa College serka minister Sithree van Heydoorn. Pa mas potrèt por bishitá: Summa MBO College