Publiká riba 10 Febrüari 2022
Willemstad – E periodo pa apliká den e trayekto di Integrashon Responsabel a inisiá na luna di mart 2021 i a terminá 31 di desèmber último. E meta di e trayekto akí ta pa personanan ku ya tabata indokumentá i/òf personanan ku no por a regresá nan pais pa motibu di COVID-19 i a bira indokumentá pero ku si ta kumpli ku e kriteria stipulá, por legalisá nan estadia na Kòrsou.
E término stipulá pa atendé e aplikashonnan ku a drenta pa e trayekto aki i pa duna un desishon ta seis (6) luna. Mirando e interes enorme ku tabatin den e trayekto Integrashon Responsabel i e kantidat grandi di aplikashon ku nos a risibí, a surgi un retraso den registrashon i tratamento di e aplikashonnan. Banda di esaki, COVID-19 tabatin impakto fuerte riba e personal di Servisio di Atmishon ku a pone ku hopi persona ku a hasi petishon pa Integrashon Responsabel no a risibí e desishon den e seis lunanan ku tin stipulá. Mirando e sirkunstansianan lamentabel ariba menshoná, a alargá e periodo di desishon ku seis (6) luna. Esaki ta nifiká ku e periodo di desishon ta bira diesdos (12) luna.
Servisio di Atmishon kier a pidi indulgensia na tur persona ku a apliká pa e trayekto ya menshoná, tanten nos ta hasi nos máksimo esfuerso pa por atendé kada un aplikashon ku e profeshonalismo i dedikashon ku a kustumbra di Servisio di Atmishon. Por último nos ke a rekordá tur persona ku a apliká i no a risibí nan komprobante ainda, ku e kontesta outomátiko ku a risibí na momentu ku a entregá e petishon, ta sirbi komo komprobante te na momentu ku risibí esun ofisial.
Pa mas informashon di Servisio di Atmishon por hasi uso di e website www.immigrationcur.org.
