Publiká riba 10 Yüni 2021
WILLEMSTAD – Minister demishonario di Desaroyo Ekonómiko, sr. Steven Martina huntu ku Minister demishonario di Tráfiko, Transporte i Desaroyo Urbano, sra. Zita Jesus- Leito, a bishitá Sha Caprileskade pa konhuntamente por haña un mihó bista den e trabounan ku ainda mester terminá na e waf den kuadro di e trayekto di renobashon ku a inisiá na aña 2018.
Sha Caprileskade ta un waf ku ta karga un balor fundamental den nos sentro di siudat; sigur komo atrakshon turístiko, pero tambe pa e merkado lokal komo un merkado aksesibel kaminda nos pueblo por akudí pa kumpra fruta, berdura i piská fresku.
Despues ku presidente Venezolano, sr. Nicolaas Maduro, a sera frontera ku Kòrsou na inisio di 2018 i e barkunan venezolano ya no por a drenta Kòrsou, e dos ministerionan a uni forsa pa duna Sha Caprileskade un kara nobo, kolorido i muchu mas higiéniko. Konseho di Minister a bai di akuerdo ku e proposishon akí dia 7 di mart 2018 i korto tempu despues a inisiá e trayekto pa limpia i drecha e waf. Durante e trayekto akí, pueblo por a tuma nota ku entre otro e waf a haña un dak nobo i kolorido i ku a limpia e sitio i kuminsá renobá e diferente tonbanknan.
Lamentablemente a enkontrá algun kontratempu ku a pone ku e trayekto pa kaba di pega mosaiko riba e diferente tonbanknan na e waf a keda stanká pa un periodo basta largu. Un kantidat di 15 tonbank ya a risibí mosaiko durante e trayekto di renovashon miéntras e otro 15 tonbanknan ainda no a keda kla. Ta e intenshon ku djabièrnè awor, dia 11 di yüni, lo re-anudá e trabounan pa kaba di pega mosaiko na e tonbanknan restante i ta spera ku pa fin di e luna akí tur e tonbanknan ta kla pa uso.
Por lo pronto, lo sigui usa Sha Caprileskade pa benta di fruta, berdura, kos di boka dushi i artesania lokal. Kunukeronan lokal ku ta interesá pa okupá un di e puestonan na e waf, por tuma kontakto libremente ku Fundashon Marshe pa mas informashon.
Na momentu ku tin mas klaridat tokante eventual regreso di e barkunan venezolano, lo adaptá e plan aktual pa por ubiká algun di e barkunan atrobe. Sinembargo, ta e intenshon ku lo aseptá ménos barku venezolano ora ta asina leu di moda ku por mantené e espasio pa produktor i bendedónan lokal por sigui bende na e waf.
