Notisia

Willemstad – Riba djabièrnè 31 di mart, Promé Minister Gilmar Pisas huntu ku Minister Charles Cooper, a presensiá firmamentu di e akuerdo entre outoridatnan di aviashon sivil di Venezuela i di Kòrsou, huntu ku DCASNP, pa por habri e espasio áereo entre Venezuela i Kòrsou bèk.

Ta habri e espasio áreo bèk entre Kòrsou i Venezuela entrante 3 di aprel 2023. Lo habri bèk den 3 fase:

• 3 di aprel: ta habri esaki pa buelonan estilo ‘charter’, esta buelonan riba petishon di un òf mas kliente spesífiko, pero no regular,
• 1 di mei lo habri esaki pa aviashon general (aviashon chikitu),
• 1 di yüli pa servisionan reglá.

Esaki ta resultado di interkambio entre Kòrsou su Outoridat di Aviashon Sivil i su ‘counterpart’ na Venezuela, esta ‘Instituto Nacional de Aeronáutica Civil’ (INAC).

E habrimentu di frontera na midi aki mester garantisá un komienso di tráfiko den un forma ordená.

Kompanianan di aviashon i operadónan privá mester di aprobashon adelantá pa tur buelo, òf seri di buelonan, di kada 2 outoridat, pues tantu di Kòrsou komo Venezuela.

Komo parti di e akuerdo, a palabrá tambe ku entre e dos paisnan, dentro di 6 luna, lo negoshá un tratado di aviashon nobo (‘luchtvaartverdrag’). E tratado aktual, ku ainda ta na vigor, ta data di 1991, i tabata konta pa Antias Hulandes, i ta bastante bieu.

Tambe DC-ANSP, e dunadó di servisio pa loke ta tráfiko áereo di Kòrsou, i su ‘counterpart’ na Venezuela, esta ‘Servicios a la Navigación Aérea’ (SNA), a firma un aktualisashon di e akuerdo aktual, ku ta reglá e komunikashon i traspaso di tráfiko áereo entre e dos instansianan aki.

E kombersashonan entre e diferente instansianan, a kuminsá despues di kombersashonnan plenario entre delegashonnan di gobièrnunan di ambos pais pa loke ta habrimentu bèk di e frontera.

MAS NOTISIA

Ministerio konserní: Tráfiko, Transporte i Planifikashon Urbano