Ta modernisá e promé stashon di wer na Kòrsou!
Publiká riba 23 Mart 2019
Minister Jesus-Leito huntu ku Servisio Meteorológiko Kòrsou a modernisá e promé stashon di wer na Kòrsou, kual ta keda na plantashi Savonet. Den kuadro di selebrashon di Dia Mundial di Meteorologia, a desvelá un plakat na e stashon aki komo esun promé na Kòrsou i asina konmemorá e esfuersonan hasí riba e tereno di meteorologiko.
Segun archivo di Meteo, a midi pa promé bia kaida di awaseru na Kòrsou na plantashi Savonet na 1830, un di e plantashinan mas grandi i mihó mantené na Kòrsou. A usa e resultadonan di e midimentu pa determiná patronchinan di kaida di awaseru i presensia di awa, ku tabata esensial pa animal i agrikultura.
Na 1894 e ‘USA Weather Bureau’ a establesé un stashon di opservashon na Kòrsou komo parti di e Sistema pa Atvertensia Tempran di Orkan (‘Early Hurricane Warning System’) na Fort Amsterdam.
Na 1947 Servisio Meteorológiko di Kòrsou tabata un di e fundadónan di e Organisashon Mundial di Meteorologia (WMO). Kòrsou ta pues un miembro importante den mundu di meteorologia.
E aña aki, Meteo a modernisá e stashon outomátiko na Savonet pa e por midi preshon i temperatura na diferente momentu, i midi e kantidat di awaseru ku a kai kontinuamente. E data aki ta kontribuí na nos konosementu di prosesonan meteorológiko i klimatológiko global i lokal, i e ta parti di un ret pa pronostiká inundashon riba Kòrsou.
