Ta prolongá periodo di aplikashon pa NOW i TBZO pa luna di novèmber & desèmber. - Informashon tokante Gobièrnu di Kòrsou Bo opinion

Notisia

Ta prolongá periodo di aplikashon pa NOW i TBZO pa luna di novèmber & desèmber.

Geplaatst op 01 December 2020

WILLEMSTAD- Pa por yuda aliviá empresarionan den nan gastunan pa ku dianan di fiesta benidero, Ministerio di Desaroyo Ekonómiko (MEO) a krea e posibilidat pa apliká e luna aki tantu pa supsidio empresarial di novèmber komo desèmber. Sinembargo, e ministerio a konstatá ku mas i mas empresanan tin difikultat pa por hasi nan aplikashon pa luna di desèmber mirando ku esaki ta un situashon eksepshonal. Pa e motibu aki, a disidí pa prolongá e periodo di aplikashon pa asina duna empresarionan e espasio pa tòg kompletá nan aplikashon pa desèmber.

E aplikashon di NOW i TBZO pa luna di novèmber, ta sosodé na e manera regular ku empresarionan a kustumbrá pa e lunanan tras di lomba. Mirando ku e aplikashon pa luna di desèmber ta sosodé promé ku e empresario tin tur dokumento nesesario pa e luna aki, MEO ta spesifiká pa medio di e komunikado aki kua ta e informashon i dokumentonan ku en todo kaso e empresario mester pa por bini na remarke.

Aparte di e dilema ku dokumento i informashonnan nesesario, MEO ta konsiente tambe ku e medidanan mas resien anunsiá pa Gobièrnu di Kòrsou den kuadro di kombatimentu di Covid-19 por resultá den mas empresa ku lo tin mester di supsidio finansiero pa luna di desèmber.

Pues konsiderando tur esaki, MEO a yega na e desishon pa prolongá e posibilidat pa ámbos petishon te ku djamars 8 di desèmber 4 or p.m.

Pa por entregá aplikashon di NOW pa luna di desèmber e kompania mester a kumpli ku tur kondishonnan di ‘compliance’ pa ku luna di novèmber; esaki ta nifiká ku tur deklarashon i pago di luna di òktober mester ta na òrdu. Tambe, e empresa mester hasi por lo mínimo deklarashon di OV di luna di novèmber ora yena su aplikashon i den e promé mitar di desèmber mester entregá i paga su deklarashonnan di OB, LB i ZV di luna di novèmber.

Pa loke ta trata petishon di empresarionan individual (TBZO) pa luna di desèmber, e empresario mester hasi su deklarashon di OB mas pronto posibel (en todo kaso den e promé mitar di desèmber).

MEO lo hasi pago di e supsidio di desèmber adelantá na e empresario individual, pero e empresario mester sòru pa entregá su deklarashon di OB i informashon di su gastunan fiho pa luna di desèmber promé ku e por hasi aplikashon pa yanüari 2021.

MEO ta spera ku di e forma aki, ta hasi ku e aplikashon pa luna di desèmber di tantu NOW komo TBZO ta mas kla i aksesibel pa tur empresa ku tin nesesidat di esaki.

Pa kualke pregunta i/òf informashon adishonal, por aserka semper e helpdesk di NOW pa medio di e mail adrès: now@fondodisosten.org òf e helpdesk di TBZO pa medio di e mail adrès: empresario@fondodisosten.org òf tambe via WhatsApp 516-2415.

Ministerio konserní