Publiká riba 13 Òktober 2022
Willemstad- Resientemente Konseho di Minister a bai di akuerdo pa reintrodusí un moratorio riba toko i minimarketnan entrante promé di òktober último. A base di e moratorio akí, Ministerio di Desaroyo Ekonómiko (MEO) lo no por otorgá pèrmitnan pa establesimentu di toko i minimarket por lo pronto. E moratorio aki ta den kuadro di un kresementu desproporshonal den e kantidat di toko i minimarketnan den algun área di nos pais. Den e mesun desishon akí, Konseho di Minister a bai di akuerdo tambe pa MEO huntu ku Ministerio di Tráfiko, Transporte i Planifikashon Urbano (VVRP) desaroyá tantu un maneho di establesimentu (vestigingsbeleid) komo un sistema di registrashon geográfiko (GIS) kual lo ser usá den futuro pa por atendé ku petishonnan pa pèrmit pero tambe pa yuda aselerá e proseso di dunamentu di pèrmit na ámbos ministerio.
Inisialmente e moratorio riba toko i minimarket a keda instituí for di aña 2014 i a keda prolongá na diferente okashon. Den e periodo di 2014 te ku awor, MEO entre otro a hasi un investigashon pa por a haña mihó bista di e situashon en general relashoná ku e tipo di establesimentunan akí, miéntras ku huntu ku VVRP a analisá problemátikanan relashoná ku kongestion di tráfiko, seguridat den tráfiko i planifikashon urbano. For di e resultadonan di e investigashon a bin ta desaroyá tantu un maneho di establesimentu komo un sistema di registrashon geográfiko (GIS).
E maneho di establesimentu (vestigingsbeleid) ku Konseho di Minister a duna aprobashon pa desaroyá, ya ta den konsepto i e meta ta pa esaki yuda den futuro ku evaluashon di petishonnan nobo pa establesimentu di toko, minimarket i otro empresanan ku ta bende komestibel. Lo tene kuenta ku entre otro e kantidat di habitantenan den e área kaminda ke establesé un toko òf minimarket, pero tambe e distansia for di e abitantenan dje área i for di otro establesimentunan similar. Tambe lo duna mihó definishon na kada tipo di establesimentu, manera supermerkado, minimarket, toko,’ convenience store’ i ‘grocery store’, teniendo kuenta ku e grandura máksimo ku kada un por tin i e tipo di produktonan ku kada un por ofresé.
E sistema di registrashon digital (GIS) lo wòrdu usá dor di tur dos ministerio pa por visualisá e ubikashon di tur supermerkado, toko i minimarket eksistente, i tambe proyektá kiko lo ta e efekto na momento ku otorgá un pèrmit nobo na un sierto sitio, na momentu ku ta evaluá un petishon pa pèrmit di konstrukshon òf pèrmit di establesimentu. Ademas e data produsí for di e sistema di GIS akí por yuda pa sigui desaroyá e maneho di establesimentu segun tempu, na un manera muchu mas mihó, efisiente i efikas. E intenshon ta tambe pa den futuro serkano hasi uso di e sistema di GIS huntu ku otro instansianan manera entre otro Ministerio di Salubridat, Medio Ambiente i Naturalesa i tambe Brandweer i BAB dor di kompartí informashon di kada lokalidat via e sistema aki, pa asina fasilitá tantu e dunamentu di konseho tokante petishonnan pa pèrmit komo e tenementu di kontrol riba establesimentunan.
