Notisia

Gobièrnu ta habri temporada di Tambú i Aguinaldo pa aña 2022 ku un seshon informativo

WILLEMSTAD – Tambú i Aguinaldo ta forma parti integral di nos kultura spesial den temporada di fin aña. Tin diferente aktividat rònt Kòrsou kaminda gruponan di Tambú i Aguinaldo ta keda invitá pa presentá nan músika spesial durante fin di aña. Kontrali na Aguinaldo, Tambú por keda toká hinter aña. Esaki a keda proklamá den un dekreto na aña 2010. P’esei Gobièrnu ta pidi tur grupo pa registrá i partisipá na un reunion informativo pa garantisá un temporada eksitoso.

Gobièrnu di Kòrsou ta hasi un yamada na tur representante di gruponan di Tambú i Aguinaldo ku ta aktivo pa e temporada di fin aña 2022 pa registrá. Den un mail informá nos nòmber di e grupo, nòmber di represenante, number di telefòn i koreo elektróniko. Regsitrá na Sektor di Kultura i Deporte na cultuur01.ucs@gmail.com òf manda un app na +599 9 567-7369. Alabes ta invitá tur representante di grupo di Tambú i Aguinaldo pa un reunion informativo. E reunion ta tuma lugá djamars 25 di òktober pa 7’or di anochi na ofisina di Sektor di Kultura i Deporte, na Bon Bini Business Center, Schottegatweg Oost # 10. Dos representante di kada grupo ta keda invitá pa haña informashon di Kuerpo Polisial i Sektor di Kultura i Deporte. Punto di agènda ta informashon di e reglanan nobo relashoná ku pèrmit di Tambú i Aguinaldo pa aña 2022.

Gobièrnu ta hasi un yamada na tur grupo di Tambú i Aguinaldo pa registrá i partisipá di forma aktivo na e reunion informativo pa nos por garantisá un temporada di Aguinaldo i Tambú eksitoso.

—

KOMUNIKASHON

MAS NOTISIA

Ministerio konserní: Enseñansa, Siensia, Kultura & Deporte