Publiká riba 23 Desèmber 2020
Willemstad – Lokèt di Pèrmit di e Ministerio di Gobernashon, Planifikashon i Servisio Públiko konhuntamente ku Ministerio di Hustisia ta informá ku entrante 1 di yanüari 2021 lo introdusí varios kambio den otorgamentu di un Deklarashon di Bon Kondukta (VOG). Kambio primordial ta e tarifa nobo pa e dokumento aki i e método di pago.
Kambionan fundamental ta den e modelo di e deklarashon, e formulario pa hasi un petishon, e forma di prosesá i atministrá e petishon i e tarifa. Petishonnan ku lo wordu hasí te ku 31 di desèmber 2020 ta kosta Fl. 1,-. Basá riba evaluashon a yega na e siguiente tarifa pa un Deklarashon di Bon Kondukta.
Personanan for di 22 aña ta paga Fl. 25,-. Personanan te ku 21 aña, Fl. 12,50. Personanan ku ta risibí ònderstant ta paga Fl. 12,50. Un karta di SOAW pa demostrá esaki ta nesesario.
Kopia di un Deklarashon di Bon Kondukta ta kosta Fl. 5,-. Pa risibí un kopia e deklarashon no por ta mas bieu ku 6 luna. Den otro kasonan ta rekerí e persona hasi un petishon nobo.
Por skohe pa paga na Lokèt di Pèrmit via un “swipe machine”, via traspaso riba kuenta di MCB number 31968600 na nòmber di Land Curaçao òf por hasi uso di ‘online payment’. Den kaso ku ta hasi un traspaso òf ‘online payment’ mester meshoná nòmber i fam di e petishonario. E komprobante mester indiká bon kla ku e pago a wordu prosesá i konfirmá. Entrante 1 di yanüari 2021 no ta aseptá pago kèsh.
Lokèt di Pèrmit ta enfatisá ku petishon pa un Deklarashon di Bon Kondukta lo wòrdu atendé solamente si e pago ta hasí adelantá i tur dokumento ta korekto i kompleto. Por hasi petishon via di email vog.vl@gobiernu.cw òf den kaso ku esaki no ta posibel por hasi e petishon personalmente na ofisina di Lokèt di Pèrmit den Eurobuilding na Saliña.
Pa mas informashon semper por tuma kontakto ku Lokèt di Pèrmit na su number temporal ku ta 433-3123.
