Publiká riba 07 Yüni 2026
WILLEMSTAD – Resientemente a tuma lugá e reunion periódiko di e triángulo entre e partnernan prinsipal den kadena di seguridat i mantenshon di lei. Durante e reunion aki a diskutí diferente tema aktual relashoná ku seguridat i desaroyonan den kadena di hustisia.
Entre e temanan tratá tabatin e lucha kontra kriminalidat i ladronisia di outo i kasnan, e preparashonnan pa aktividatnan i festividatnan relashoná ku e Mundial di Futbòl, pero tambe pa garantisá órden públiko i seguridat durante e próksimo periodo di fakansi.
Ademas, a pone atenshon na diferente desaroyo aktual den kadena di hustisia, kaminda e instansianan involukrá a interkambiá informashon i a yega na akuerdo tokante un “approach” konhunto di diferente reto di seguridat ku ta toka nos komunidat. Den e marko aki, a enfatisá e importansia di un maneho integral, kaminda prevenshon, mantenshon di lei i kolaborashon ta bai man den man pa por kontrarestá kriminalidat di manera efektivo i fortalesé seguridat di nos pueblo.
Tambe a diskutí e preparashon operashonal di e servisionan involukrá i e nesesidat pa reakshoná na tempu riba eventual desaroyonan ku por tin influensia riba òrdu públiko i seguridat. Mediante koordinashon regular, e diferente partnernan den e kadena por aktua mas lihé, kompartí informashon i tuma akshon huntu ora ku e situashon asina ta eksigí.
E partisipantenan (KPC, SDKK, OM i Ministerio di Hustisia) a resaltá e balor di kolaborashon struktural entre tur partner den e kadena di seguridat. Seguridat ta un responsabilidat kompartí i solamente por ser logra mediante koordinashon kontinuo, interkambio efektivo di informashon i kompromiso di tur organisashon involukrá.
Minister di Hustisia, mr. Shalten ta ekspresá su apresio pa e kontribushon konstruktivo i e gran kompromiso di tur esnan ku a partisipá. E esfuerso konhunto di tur partnernan ta sigui siendo esensial pa promov’é seguridat, visibilidat i e estado di derecho na Kòrsou. Mediante e reunionnan periódiko aki, no solamente ta traha riba e desafionan aktual, sino tambe riba e fortalesementu di e kolaborashon mutuo i mehoramentu kontinuo di e servisio na nos komunidat.
