Notisia

Gobièrnu di Kòrsou  ta habri temporada di Tambú i Aguinaldo 2023 ku un reunion informativo pa gruponan di Tambú i Aguinaldo

 Willemstad- Tambú i Aguinaldo ta forma un parti integral di nos kultura espesial den temporada di fin aña. Lo bai tin hopi aktividat rònt Kòrsou kaminda gruponan di Tambú i Aguinaldo ta keda invitá pa presentá nan músika pa di fin di aña.

Kontrali na Aguinaldo, gruponan di Tambú si por toka hinter aña, esaki a keda proklamá den un dekreto na aña 2010.

Fin di aña ta aserkando i Gobièrnu di Kòrsou ta hasi un yamada na tur representante di Gruponan di Tambú i Aguinaldo, ku ta aktivo pa e temporada di fin aña 2023, pa inskribí bo grupo di Tambú i Aguinaldo pa e temporada aki, serka nos na Sektor di Kultura i Deporte. Manda un mail pa sueellen.cijntje@owcs.gov.cw òf WhatsApp na +599 9 513-6973.

Nos ke hasi uzo di e oportunidat aki pa invitá tur representante di Gruponan di Tambú i Aguinaldo na un reunion informativo, kual lo tuma lugá djárason 20 di Sèptèmber 2023, pa 7’or di anochi na Ministerio di Enseñansa, Siensia, Kultura i Deporte na ofisina di Sektor di Kultura i Deporte na Bon Bini Business Center, Schottegatweg Oost # 10. Dos representante di kada grupo ta keda invitá pa ta presente pa haña informashon serka entre otro funshonario(nan) di Kuerpo Polisial. Ta duna informashon di e reglanan nobo pa loke ta trata pèrmit di Tambú i Aguinaldo pa aña 2023.

Sektor di Kultura i Deporte ta konta ku lidernan di gruponan ta registrá i ta presente na e reunion i risibí informashon balioso pa asina huntu nos por garantisá un temporada di Aguinaldo i Tambú eksitoso.

—————————————————————————————————————————
No pa publikashon: Si tin sugerensia, Remarke i/òf informashon por tuma kontako ku sra. Cijntje na 513-6973

MAS NOTISIA

Ministerio konserní: Enseñansa, Siensia, Kultura & Deporte