Tim di Krísis a skohe kompania di seguridat i maneho di multitut basá riba eksperensha i bon resultado - Informashon tokante Gobièrnu di Kòrsou Bo opinion

Notisia

Tim di Krísis a skohe kompania di seguridat i maneho di multitut basá riba eksperensha i bon resultado

Geplaatst op 06 June 2020 dor di Ministerio Salubridat Públiko, Medio Ambiente i Naturalesa

WILLEMSTAD –  Despues di 6 di mei ku a resultá ku e medidanan di prevenshon di Gobièrnu tabatin e resultado ku a spera i ku por asumí ku plamamentu di COVID-19 internamente ta bou di kontròl, a inisiá e proseso di de-eskalashon. Esaki ta nifiká entre otro ku por kuminsá tambe ku e proseso di repatriashon di residentenan di Kòrsou ku a keda pegá den eksterior. E kriterionan ku mester kumpli kuné ta por ehèmpel pa tin un pasashi di regreso, pero tambe ku tur persona ku regresá Kòrsou mester bai 14 dia den karentena. Pa ta sigur ku tur persona ta kumpli ku e reglanan di karentena e Tim di Krísis a tuma desishon pa buska un kompania pa tene supervishon.

A skohe e kompania Texpirience basá riba nan vasto eksperensha riba tereno di maneho di multitut durante eventonan grandi manera Kaya Kaya. Ministerio di GMN i otro ministerionan tin tambe bon eksperensha ku e manera profeshonal ku e kompania ta funshoná i e manera ku e kompania a konsehá i asistí otro ‘stakeholders’ relashoná ku distansha sosial. Den kuadro di e karentena obligatorio e kompania ta enkargá básikamente ku atministrashon, logístika i seguridat na e sitionan di karentena. Den esaki Texpirience ta atkerí servisionan di otronan tambe manera hürmentu di dranghek.

Aktualmente tin alrededor di 500 persona den karentena repartí bou di mas ku 15 hotèl i esaki ta rekerí pues vigilansha 24 ora pa dia. Empleadonan di tur hotèl a haña instrukshon kon pa traha i atendé den e situashon aki. Texpirience ta trahando konhuntamente ku por ehèmpel e hotèlnan, ABC Busbedrijf, CTB, Imigrashon, Duana, CAP, Relashonnan eksterior, ESF-6 i departamentu di Epidemiologia di Ministerio di GMN pa asina duna un aporte supstanshal na organisashon di e karentena. Relashoná ku esaki Tim di Krísis ta gradisí tur esnan ku a pasa den e proseso di karentena i ku a mustra gratitut pa e manera organisá i profeshonal ku e proseso a tuma lugá.

Ministerio konserní