Publiká riba 15 Ougùstùs 2025
WILLEMSTAD – Den kuadro di duna bèk na nos komunidat i tambe proyekto di resosialisashon, Sentro Detenshon i Korekshon Kòrsou (SDKK) e aña aki huntu ku Minister di Hustisia, mr. Shalten Hato a lansa e kampaña di SDKK Barbershop Back 2 School”, kual durante di e kampaña aki, muchanan lo por pelá i peña grátis. E inisiativa ta duna oportunidat na muchanan di 6 te 17 aña pa nan por sinta serka un barbero profeshonal den barberia di SDKK òf un peinado, na preparashon pa kuminsá e aña eskolar nobo ku kabei nèchi i tambe un pela strak.
Nos tur por kòrdá kon bou di maneho di Minister di Hustisia, mr. Shalten Hato, a inisiá ku e kursonan den SDKK pa duna lès di pelamentu. Bou di guia profeshonal, alrededor di 20 personal a siña kon pa pela di forma profeshonal, i a risibí nan sertifikado tambe na momento ku nan a pasa e kurso ku éksito. Aktualmente tin un segundo grupo den SDKK ku tambe ta siguiendo e kursonan di pelamentu aki, i ta kanando den bon direkshon den nan desaroyo komo peladó.
E pelamentu i peñamentu den kuadro di SDKK Barbershop Back 2 School lo tuma lugá riba dianan 17, 18 i 19 di Augustus na dos lokashon: tantu den SDKK mes i tambe na Schotborgh School na Koraal Specht. Muchanan ya a risibí kaba nan lokashon ku nan lo mester tei riba e fechanan aki, pa asina risibí nan trato VIP serka SDKK.
Inisialmente, e proyekto a ser diseñá pa yunan di detenidonan di SDKK so, pero despues di a deliberá ku Minister Hato, i mirando e entusiasmo di e barberonan den SDKK pa duna bèk na komunidat i demostrá ku no opstante tur situashon nan tambe ke hasi algu positivo pa nos hóbennan, a disidí na habri e portanan i duna oportunidat na studiantenan di Schotborgh School, ZMLK Marieta Alberto i yunan di e besindario di Koraal Specht. E manera aki, un grupo mas grandi di mucha por haña benefisio di e akshon sosial aki.
For di momentu ku Minister di Hustisia, Shalten Hato, a anunsiá e kampaña, e kantidat di reakshon positivo for di komunidat tabata inmenso. Organisashon den e kadena hudisial manera Kuerpo Polisial Kòrsou i Brantwer Kòrsou tambe a brasa e idea ku hopi entusiasmo i a laga algun kolega di nan tambe djòin e kousa pa pela algun hóben di forma grátis.
E proyekto “SDKK Barbershop Back 2 School” ta parti di un seri di inisiativanan di resosialisashon ku SDKK ta desaroyá. E ta representá mas ku un kabei bunita pa skol; e ta simbolisá un komienso nèchi i bunita pa e mucha ku ta bai skol i pa e kliente ku ta buskando su kaminda bèk den e komunidat.
Pa partisipá, registrashon adelantá ta obligatorio. Nos ke duna espasio na muchanan di Koraal Specht ku ainda no a registrá pa e bunita gesto aki, pa tuma kontakto lihé, pasobra ainda tin algun lugá disponibel.
Informashon pa registrashon:
• Telefòn: 434 8481
• Telefòn: 434 8447
• Selular: 694 2187
No laga e oportunidat aki pasa bai pa por risibí un pela òf peña grátis serka barbershop di SDKK ku ta kla pa duna nan granito na nos komunidat.
