Publiká riba 16 Yanüari 2024
Willemstad- Resientemente, Minister di Desaroyo Ekonómiko, Ruisandro Cijntje, a presentá na Konseho di Minister e rapòrt sientífiko ‘The Curaçaoan economy in relation to other small island states’ den kua ta kompará ekonomia di Kòrsou ku ekonomia di otro paisnan chikí den desaroyo, e asina yama ‘Small Island Development States’.
Ku e meta pa realmente duna kontenido na e resultado di e estudio, e rapòrt ta proponé intervenshonnan konkreto teniendo kuenta ku Kòrsou su desaroyo for di aña 2000 i su progreso kompará ku otro paisnan den desaroyo. Algun di e rekomendashonnan salí for di e rapòrt enkuestion ta e.o., atraé mas invershon dirèkt for di eksterior; implementá strategia pa modernisá e konsepto di Zona liber (E-Zones), stimulá sektornan ku kapasidat pa atraé divisa manera entre otro: ‘Transnational Education’, i otro sektornan di eksportashon ku ta di balor agregá manera determiná den ‘National Export Strategy’. Tur esakinan ta aspektonan ku Ministerio di Desaroyo Ekonómiko (MEO) lo bai traha riba dje òf ya ta trahando riba dje den aña 2024 padilanti di moda ku por garantisá desaroyo duradero pa Kòrsou.
MEO a laga hasi e investigashon aki pa por studia e struktura di Kòrsou su ekonomia riba nivel makro ekonómiko kompará ku otro islanan chikí den desaroyo (SIDS). Esaki a tuma lugá ku asistensia di “International Association of Dutch Municipalities” (VNG International), i ku apoyo di Ministerio di Asuntunan Interior i Relashon den Reino (BZK). E estudio a wòrdu hasí dor di Profesor Roger Hosein di universidat di West Indies na Trinidad.
Banda di eksaminá Kòrsou su struktura ekonómiko den komparashon ku otro islanan chikí den desaroyo riba un base makro ekonómiko, e meta di e estudio aki tabata tambe pa identifiká nesesidatnan ekonómiko i haña sa kon pa duna kontenido na e nesesidatnan aki pa asina saka benefisio ekonómiko for di esakinan. E resultado di e estudio konkretamente ta duna e.o. informashon tokante di un banda e aspektonan den kua Kòrsou, kompará ku otro islanan chikí den desaroyo, ta sobresalí i di otro banda aspektonan den kua Kòrsou ta defisiente. Ademas, e estudio ta duna un bista riba e struktura di komèrsio lokal, es desir e kapasidat pa generá divisa, i e struktura di produkshon lokal, relashoná ku stabilidat i kresementu ekonómiko. Esakinan teniendo kuenta ku kondishonnan di manehonan asosiá ku e tema i intervenshon ekonómiko ku a wòrdu apliká dor di otro islanan chikí den desaroyo pa asina realisá desaroyo duradero pa Pais Kòrsou tambe.
Pa mas informashon por referí na e rapòrt dor di klek aki òf por manda mail na info.meo@gobiernu.cw.
