Pa promé biaha den historia di Kòrsou un dosente di nos ku ta nominá i a sali den e tòp 10 dosente. Esaki ta un kompetensia ku ta tuma lugá na Hulanda, kaminda organisashon i/òf dosente i/òf alumno ta nominá e dosente ku segun nan mester sali dosente di aña. Minister Sithree van Heydoorn a haña sa esaki i a disidí, meskos ku na Hulanda, di sopresá e dosente na skol. Pues, riba petishon di Minister i huntu ku direktiva di skol, direktor di skol i dosentenan di e skol a logra organisá un aktividat pa minister Van Heydoorn hasi e anunsio awe mainta.
Felisitashonnan a drenta for di awe mainta tempran pa sr. Gilliard (Tito) Doran serka minister di parti di sra. Kristen Cuppen (dosente di aña di 2012), sr. Pieter Uitenbogaard (dosente di aña 2023) i sr. Kennedy Thielman (dosente na Hogeschool Tilburg). Tur ta felisitá sr. Doran ku e posishonamentu den tòp 10 nominado. Awor ta bai sigui pa saka e tòp 3 i na luna di òktober ta saka e ganadó di e kompetensia di dosente di aña.
Minister van Heydoorn a indiká ku pa nos aki na Kòrsou sr. Doran ta e ganadó asoluto. Pues ta kuminsá selebrá for di awor. Parlamentario Gilbert (Gibi) Doran sumamente emoshoná a felisitá su yu i yam’é danki pa saka kara di famia Doran. Sr. Gilliard Doran tambe sumamente emoshoná, pasobra e no tabata sa nada di esaki. Na su turno el a yama tur hende presente danki i tabata sumamente kontentu ku e sorpresa.
Minister sr. Sithree van Heydoorn ta kontentu ku e logro akí, pasobra komo pais nos ta sigui mustra riba nos mes hendenan ku ta traha di forma profeshonal i positivo pa nos pais. P’esei komo minister el a indiká di sigui traha na bienestar di nos hendenan ku ta traha den enseñansa.
—
KOMUNIKASHON
*riba e potrètnan athunto por tuma nota di e aktividat i pa mas potrèt por bishitá: Album Tito Doran
