E Kick Off a tuma lugá na Marriott Beach Resort kaminda minister di Enseñansa, Siensia, Kultura i Deporte (ESKD) sr. Sithree van Heydoorn den presensia di vários Parlamentario, minister di Hustisia sr. Shalten Hato, i minister di Desaroyo Ekonómiko sr. Roderick Middelhoff a hasi e anunsio simbóliko den forma di firma un akuerdo pa traspaso di e aparatonan. E traspaso a keda firmá ku tur e 8 direktiva di skolnan supsidiá. Durante di e aktividat vários tema di importansia pa digitalisashon a keda presentá den forma di produkshonnan digital.
Ku mas ku 200 invitado Minister di Enseñansa, Siensia, Kultura i Deporte (ESKD) Sithree van Heydoorn kompañá pa presidente di e komishon di Digitalisashon sra. Samira Saab i den presensia di Tim di Maneho, a hasi entrega di un regalo di apresio na Blue Nap, WWC, EY, Edutrainers, RAC i IT-solutions. E apresio aki a keda otorgá na e stakeholdersnan aki komo ku huntu nan a traha di forma inkansabel pa logra e meta aki.
Durante di e siman di 23 yüni te ku 1 yüli 2025 ta entregá e aparatonan ku ta un laptop na mas ku 2500 personal. E personal a keda invitá kaba pa e dianan ku nan ta risibí na aparato.
A la bes ta informá ku pa seguridat di e aparato, tin e logo di Ministerio riba dje i e ta keda registrá ku un chip. Esaki ta nifiká ku e aparato ta protehá i sigurá tur informashon di skol, dosente i alumno. Na momentu ku esaki pèrdè òf keda hòrtá por de-aktivá esaki di forma ku e no por keda uza mas. Òf por aktivá e chip den dje pa haña sa unda e ta. Pues esaki ta pa salbaguardiá e seguridat di e aparato, dato nan di alumno, studiante, dosente, direktiva i gobièrnu.
Ministerio di ESKD por mira bèk riba un aktividat eksitoso i ta sigui traha huntu ku minister sr. Sithree van Heydoorn na adelanto i desaroyo di nos enseñansa.
—
KOMUNIKASHON
