Tópiko sentral durante interkambio entre minister Koeiman i SER - Informashon tokante Gobièrnu di Kòrsou Bo opinion

Notisia

Tópiko sentral durante interkambio entre minister Koeiman i SER

Geplaatst op 17 January 2021 dor di Ministerio Desaroyo Sosial, Labor i Bienestar

Investigashon empíriko ta nesesario pa determiná si maneho riba suèldu mínimo mester ser adaptá

WILLEMSTAD, 17 di yanüari 2021 – Durante un enkuentro ku a tuma lugá djabièrnè dia 15 di yanüari último den sala di reunion di Konseho Sosial Ekonómiko (SER) na Ansinghstraat, minister Hensley Koeiman di Desaroyo Sosial, Labor i Bienestar (S0AW) a interkambiá di idea ku miembronan di e konseho i a bai mas den detaye riba su proposishon pa laga SER, ku ta e órgano di konseho i konsulta pa gobièrnu i parlamento riba témanan ku un karakter sosio-ekonómiko, asumí e ouspisio i koordinashon di un investigashon empíriko na e efektonan sosio-ekonómiko di ahustenan ku periódikamente ta ser hasí na e nivel di e salario mínimo na Kòrsou. Basá riba resultado di e investigashon ku, na opinion di e mandatario mester ser kondusí ku aporte tékniko di entidatnan manera entre otro banko sentral i ofisina sentral di estadístika (CBS) i tambe organisashon internashonal di trabou ILO, lo deteminá sí i den ki forma e maneho aktual mester ser adaptá i/o reformulá pa alsa su efektividat.

E rekomendashon pa laga hasi un investigashon o estudio empíriko na e efektonan sosio-ekonómiko di adaptashonnan na salario mínimo a sali for di SER. Den su konseho di fin di aña pasá pa ku indeksashon di salario mínimo pa aña 2021 SER a bolbe enfatisá e nesesidat i balor agregá di un investigashon sientífiko. Den un estudio basta ekstenso ku SER a saka na aña 2017 riba e tema di salario mínimo ya tabatatin rekomdendashonnan hasí den e direkshon ei. Na opinion di e órgano konsultivo, ku ta konsistí di representantenan sindikal, empresarial i ekspertonan independiente, e lei riba suèldu mínimo aktual ta duna e minister e outoridat pa, despues di konsultá ku SER, disidí si pa e aña próksimo e lo indeksá salario mínimo basá riba e tasa di inflashon registrá pa CBS. Den e proseso ei e minister por desviá for di konseho di SER.

Na opinion di sr. Koeiman ta prudente i responsabel pa banda di e outoridat ku e tin komo minister di SOAW bou di e lei di suèldu mínimo laga e ahustenan anual wòrdu di ‘toets’ tambe na un kuadro mas amplio ku kriterionan ophetivo manera por ehèmpel nivel di kresementu ekonómiko i desaroyo di e produkto interno bruto di pais. Komo ku e efektonan sosio-ekonómiko di e ahustenan ta relatá na temanan manera trabou digno, produktividat laboral, siguridat na trabou i kresementu ekonómiko duradero e titular di SOAW a wak e nesesidat pa organisá den kurso di e aña aki dos konferensia den kua e temanan aki ta pará sentral. Aki tambe SER lo tin ku fasilitá asumiendo e ròl di koordinadó.

Durante e interkambio di djabièrnè último a palabrá ku lo sigui den konsulta estrecho ku otro pa ku e follow up.

Ministerio konserní