Trabou ta bai kuminsá - Informashon tokante Gobièrnu di Kòrsou Bo opinion

Notisia

Trabou ta bai kuminsá

Geplaatst op 04 September 2017 dor di Ministerio Asuntunan General i Promé Minister

Djadumingo atardi 3 di sèptèmber 2017 gobièrnu di Kòrsou a hasi  entrega ofisial di e Programa di Urgensia na representantenan di e 4 barionan. E Programa di Urgensia tin komo título “Pa mehorá kalidat di bida den bario”.

Ku e entrega ofisial aki e trabounan riba nivel di bario ta bai kuminsa. Dentro poko, kada grupo ta bai organisá su propio evento huntu ku habitantenan komo komienso di e aktividatnan den e bario konserni.

E entrega ofisial a tuma lugá den bario di Buena Vista, ku ta un di e areanan skohí. E otro tres areanan ta Banda Bou, saliendo for di Barber, Montaña i Otrabanda.

Manera a splika, pa skohe e areanan den kual ta kuminsá traha, a usa diferente kriteria. Por ehèmpel, no a skohe bario kaminda mester hasi trabounan di infrastruktra grandi. E área mester tin sierto fasilidatnan eksistente pa por hasi sierto aktividatnan i traha huntu, manera un sentro di bario, un skol, fasilidatnan deportivo, misa ets. Pesei e area mester tin tambe un skol pa VSBO/AGO mirando ku investigashon riba salubridat bou di hubentut, a mustra ku den e grupo aki tin hóbennan ku ta mas vulnerabel. Tambe a skohe pa e barionan ta repartí riba Kòrsou.

Segun ekspertonan riba tereno di kombatimentu di pobresa rònt mundo, ta importante pa kombiná sierto aktividat ku otro i ehekutá esakinan huntu pa asina logra mehorá e kalidat di bida na nivel di bario. Pesei den e Programa di Urgensia e aktividtanan ta dirigi riba 5 tema, ku ta menshoná den e Akuerdo di Gobernashon di e partidonan PAR, MAN i PIN, esta:  Enseñansa i Edukashon, Ekonomia i Trabou, Salubridat i Situashon Ambiental, Famia Komunidat i Seguridat, i Bon Gobernashon.

Durante e atardi na Buena Vista, a duna splikashon di e forma ku ta bai traha i e diferente aktividatnan ku ta bai hasi. Despues di e presentashon, tur hende presente a pasa pa patio, kaminda den un forma simbóliko a enfatisá riba e unidat i koperashon ku mester di tur esnan involvi, pa por logra e kambio ku nos tur ta deseá.

Riba e fotonan ta mira momento ku Ministernan huntu ku bario ta forma un kadena i ta firma e Programa di Urgensia komo muestro di nan kompromisio ku otro i ku komunidat.

Ministerio konserní