Trabounan di infrastruktura na parti Wèst di Kòrsou por kousa molèster - Informashon tokante Gobièrnu di Kòrsou

Notisia

Ministerio konserní Tráfiko, Transporte i Planifikashon Urbano
 

Trabounan di infrastruktura na parti Wèst di Kòrsou por kousa molèster

Publiká riba 04 Sèptèmber 2017

Hendenan ku ta bai direkshon di Westpunt tin ku tene kuenta ku diferente trabounan di kaya, ku por okashoná molèster pa outomobilistanan den e siman ku ta sigui. Obra Públiko ta traha riba proyektonan largu na dos kaminda di e parti Wèst di nos isla, pa mehora e infrastruktura i na mes un momentu sòru pa e kamindanan ta mas sigur pa e hende ku ta trafiká riba dje. Ta trata di trabounan na Kaminda Popo Rojer na altura di Barber i di Kaminda di Westpunt, entre Wakawa i Savonet.

 E trabounan na Barber, dilanti di e banko i di e konosido marshe, ta kuminsá riba djaluna dia 17 di yüli próksimo.  Ta kita e kapa di asfalt i fundeshi, sak e kaya 12cm pa por mantené e altura di alsera intakto. Despues ta pone un fundeshi nobo di “kalksteen” i un kapa nobo di asfalt di 7cm. Ta krea posibilidat pa parker na banda di kaya. E asera ta haña un fundeshi nobo di diabaas ku un kapa di aros di 5cm , ku klenku i bant haltu di betòn.

 Ta traha tambe kuater parada di bus, di kual unu riba asera, kaminda ta posibel pa pone un abri (kasita pa skonde pa solo i áwaseru). Pa evitá ku tráfiko ta pasa muchu duru den e besindario kaminda tin bastante hende na pia, ta pone kuater kusinchi pa baha velosidat i zebrapad pa krusa kaya. Ehekushon di e trabounan tin un durashon di 12 siman, partí den dos fase pa minimalisá mas tantu posibel e molèster pa tur usuario.

Durante di e trabounan ta tene e kaya parsialmente será pa tráfiko. Pa subi Kaminda Popo Rojer ta desviá tráfiko riba Weg naar Westpunt via Kaya Emiterio Doran (Parke Himno i bandera) i Kaya Johannes Fransisco i sigui pa direkshon di e rotònde i vise vèrsa. Kaminda Popo Rojer ta keda aksesibel pa habitantenan i komersiantenan, ounke ta pidi si pa hende tene kuenta ku e trabounan na e pida kaminda.

E otro proyekto ku tráfiko tin ku tene kuenta kuné ta esun riba Kaminda pa Wèspen. Akinan e kontratista Aliansa BV ta sigui ku e trabounan di asfaltá e kaminda for di Wakawa bai Savonet. E trabounan aki ta sufri di un tiki tardansa pa motibu ku algun biaha kaba , dor di falta di bitumen, ku ta mara e asfalt na otro. Dor ku sentral di BOO no ta traha na su kapasidat mas haltu, tin falta di e produkto akí.

Hende ku ta bai òf bin for di Wespen, mester tene kuenta ku e pida kaminda ei ta será durante di e trabounan, pa motibu ku asfalt kayente por hasi daño na tayer di outo. Obra Públiko i Aliansa ta pidi pa tuma e ruta alternativa via di Lagun-Sta.Cruz-Soto i direkshon kontrali. Ta pidi komprenshon pa e molèster kousá, ku, na final di e proyekto, ta terminá den un kaminda mas mihó, duradero i sigur.