Publiká riba 10 Novèmber 2020
WILLEMSTAD – Minister Jesus-Leito huntu ku Servisio pa Obra Públiko (OW) i kontratista MNO Vervat ta informá ku trabounan di mantenshon di Brùg Koningin Juliana ta bai kuminsá.
E trabounan ta enserá drecha e riel (‘railing’) i e alsera parti abou di e konstrukshon di stal di e brùg. Esei ta enserá ku durante e promé fase, komunidat i tráfiko lo sinti efekto mínimo di e trabounan. Lo hasi trabou di reparashon i las na e riel i alsera.
Brùg Koningin Juliana ta un dje adernan mayó di nos infrastruktura i ta mas di 50 aña bieu kaminda diariamente mas di 50.000 vehíkulo ta pasa riba dje. Na aña 2004 a hasi trabounan di konservashon na e parti di Punda. Despues di 15 aña, a bira tempu pa hasi trabou di konservashon di nobo mirando ku algun kaminda a konstatá frus. E brùg ta den un medio ambiente agresivo ku hopi salpeter i chèmènè.
Pa realisá e trabounan, lo tin bakinan bou di e brùg instalá ku ta move pa medio di un mekanismo di kabel. Di e forma aki, por yega na e partinan di e brùg pa hasi e trabounan di mantenshon. E trabounan ta kuminsá n’e banda di Otrabanda parti sùit yega te na mitar di brùg, i despues ta sigui ku parti nort. Despues ku finalisá e parti di Otrobanda, e parti di Punda ta na turno. Na momento ku e trabounan ta tuma lugá, tráfiko por sigui move nòrmal. Riba e alsera lo pone material pa protekshon di e trahadónan.
E trabounan ta den man di e kontratista MNO Vervat i nan lo dura te mas òf ménos sèptèmber di aña 2022. Segun ku e trabounan ta avansando lo informá komunidat debidamente. Lo tin bòrchinan di atvertensha i ta pidi outomobilistanan pa kore ku koutela, i na mes momento ta pidi diskulpa pa kualke inkumbiniensia.
