TRABOUNAN DI MANTENSHON NA E “PARKEERPLAATS” DI COLON - Informashon tokante Gobièrnu di Kòrsou Bo opinion

Notisia

TRABOUNAN DI MANTENSHON NA E “PARKEERPLAATS” DI COLON

Geplaatst op 13 October 2017 dor di Ministerio Tráfiko, Transporte i Planifikashon Urbano

Trabounan di mantenshon na e “Parkeerplaats” di Colon!

 

Willemstad – Minister di Tráfiko, Transporte i Planifikashon Urbano sra. Zita Jesus Leito i  Obra Públiko (OW) ta anunsiá  ku entrante djaluna 16 òktober, ta kuminsá ku trabounan di mantenshon na e lugá di stashoná outo di Colon. E trabounan tin un durashon di dos siman, i durante di e trabounan di mantenshon tin diferente desviashon di tráfiko pa stashoná outo ku mester tene kuenta kuné den e área.

 

Shofùrnan di bus pa un temporada kaba tin ku hasi un ‘U-Turn’ dilanti di Colon despues ku a sera Hamelbergweg. E situashon aki no ta esun mas sigur den tráfiko i nan tabatin un kombersashon ku Minister den kual nan a trese nan preokupashon dilanti.

A yega na un palabrashon entre Minister di Tráfiko, Transporte i Planifikashon Urbano i e sindikatonan di shofùrnan di bus ku lo bai traha riba un solushon. Den preparashon di e proyekto aki a inkluí e palabrashon i ta kumpli pues ku petishon di shofùrnan di bus pa nan por lora di un manera mas sigur dilanti di Colon, subi e lugá di stashoná outo i sali parti pabou i sigui nan destino. 

 

Tambe a kombersá ku e komersiantenan den edifisio di Colon pa splika nan e situashon. Realisando e proyekto di drecha e lugá di stashoná outo, ta hasi e aksesibilidat di kliente na e diferente espasionan den Colon mas fásil. Loke ta un balor agregá pa e komersiantenan. Durante di e trabounan, e stashonamentu di outo por tuma lugá normalmente pasombra no ta sera e espasio kompleto. Lo sera un parti kaminda ta traha i despues ta sigui e di dos parti. Di e forma aki, e inkumbinensianan ta limitá.

Na momento ku e trabounan ta tuma lugá tur negoshi ta keda aksesibel pa medio di un via indiká ku bòrchi.

 

E trabounan ta tuma lugá riba e lugá di stashoná outo parti pabou di Colon, ku ta di e edifisio di Colon te na e santana Protestant i di e edifisio antes di Chephacu te na KFC.

Lo repartí e trabou den dos fase loke ta nifiká ku ta sera e lugá di stashoná outo parsialmente pa hasi  e trabounan i despues e di dos mitar. Na final di e trabou lo tin espasio pa algu mas ku 100 outo stashoná riba e tereno. E trabounan ta enserá  ku lo drecha e kaya entre santana Protestant i e edifisio antes di Chephacu  i hasi e kaya di dos direkshon pues por subi i sali for di e lugá di stashoná outo. Lo kita e asfalt bieu i kibra i pone nobo miéntras ku lo marka e lugánan di stashoná outo.

 

OW ta pidi tur usuario di e área pa sigui indikashonnan di bòrchi pa por stashoná outo. Tambe pa tene kuenta ku e trabounan ta tuma lugá durante dia. Si tur kos kana segun plan e trabounan ta finalisá den dos siman.

 

 OW, kontratista CATSPATRAN NV i Kuerpo Polisial Kòrsou ta pidi indulgensia pa eventual molèster pa e kambio temporal. Pa kualke pregunta tokante e proyekto por tuma kontakto ku Obra Públiko via e number 433-4327, Whats app +5999511-8582 òf via di e-mail info.vvrp@gobiernu.cw

Ministerio konserní