Publiká riba 24 Novèmber 2023
Willemstad – Minister Charles Cooper huntu ku Servisio pa Obra Públiko (OW) ta informá ku entrante djaluna di 27 novèmber, trabounan di mantenshon ta bai kuminsá riba Weg naar Willibrordus for di Kunuku Aqua Resort te ku Williwood.
Weg naar Willibrordus tambe ta forma parti di e proyekto ‘Life Extension’. Debí na mal estado di e kaminda aki, OW ta hasi trabounan di mantenshon riba e karetera. Kontratista MNO-Vervat ta enkargá ku ehekushon di e trabou aki, ku lo tin un durashon di mas o menos 4 siman.
Durante ehekushon, habitantenan i negoshinan ku ta keda riba e kaya ariba menshona por yega nan kas òf establesimentu normalmente. Pa otro outomobilistanan ku tin ku hasi uzo di e karetera aki, lo tin ruta alternativo guiá pa barinan oraño i bòrchinan ku ta indiká.
OW ta hasi un apelashon na tur outomobilista pa kore ku koutela.
