Publiká riba 28 Febrüari 2023
Willemstad- Djamars 28 di febrüari, Minister di Desaroyo Ekonómiko, sr. Ruisandro Cijnte, a firma un akuerdo di ehekushon ku e kompania JEMAR N.V. pa kuminsá ku trabounan di renobashon i mantenshon na edifisio di Plasa Nobo (Marshe Rondó). Despues di a tene un destaho públiko, JEMAR N.V a resultá e kompania indiká pa hasi e tarea aki di renobashon i mantenshon. 
E trabounan den e promé fase di e proyekto akí ta bai enserá entre otro reparashonnan na e dak i drecha e flur na e piso abou. Tambe mester drecha e betonrot na sierto partinan di e edifisio, e riolering i e situashon di elektrisidat aktual. Huntu ku tur esaki, e edifisio mester wòrdu di fèrf di moda ku esaki ta keda mas limpi, bunita i estétikamente agradabel.
Despues ku tur e trabou di reparashon i renobashon ta kla, por pasa pa e siguiente fase di e proyekto ku lo ta e redekorashon di e parti interior di e edifisio.
Den un desishon di Konseho di Minister fechá 13 di novèmber 2019, e asina yamá ‘Inrichtingsplan Marktgebouwen en – gebieden Binnenstad’ a keda akordá. E punto di salida mas importante den e plan akí ta, pa ekipá i mantené tur nos edifisionan di marshe pa asina duna un impulso na nos sentro di siudat i stimulá mas aktividat i invershon den Punda i Otrabanda. Algun tempu pasá por a tuma nota di e trabounan di renobashon ku a tuma lugá na e edifisio di Plasa Bieu i awor ta toka turno pa Plasa Nobo.
Den e ‘Inrichtingsplan Marktgebouwen en – gebieden Binnenstad’ ta indiká por ehèmpel ku Marshe Rondó den futuro lo mester bira un kombinashon di un merkado moderno, un selekshon di restorant i un terasa riba dak aksesibel ku bista riba sentro di siudat. Tur esaki ta bira posibel despues ku kaba di kumpli ku e trabounan di reparashon i mantenshon nesesario.
E importansia di kada edifisio di marshe den nos sentro di siudat ta indiskutibel; tantu pa nos propio komunidat, komo tambe pa kada turista ku bishitá nos isla. Mantenshon i reparashon regular na e edifisionan akí ta kontribuí na alsa e balor kultural i ta mustra un bista muchu mas ordená den nos sentro di siudat. Awor ku ofisialmente e akuerdo ta firmá entre Gobièrnu di Kòrsou i JEMAR N.V, e trabounan nesesario por start pronto.
