Publiká riba 15 Yanüari 2023
Willemstad – Servisio pa Obra Públiko (OW) ta anunsiá ku riba djamars 17 di yanüari e kontratista DCG Services ta bai hasi trabounan na e lusnan di tráfiko na áltura di e krusada na entrada di Parera, esta krusada Presidente Romulo Betancourt Boulevard/Abattoirweg/Berg Carmelweg.
Lo kambia e lusnan di tráfiko pa hasi nan lusnan LED. E trabounan ta kuminsá riba djamars 17 di yanüari i ta terminá pa djabièrnè 20 di yanüari. Lo traha entre 8.30am pa 11.30am di mainta, i di 1.30pm pa 4.00pm di mèrdia. Di e forma aki, ta minimalisá molèster pa tráfiko.
Esaki ta enserá ku e lusnan di tráfiko aki lo ta for di servisio. Na momentu ku esaki ta e kaso, reglanan di tráfiko di un krusada ta vigente, i mester respetá bòrchinan di tráfiko.
OW ta pidi un i tur pa kore ku koutela durante e dianan aki i asina evitá aksidente.
