Publiká riba 24 Sèptèmber 2023
Willemstad – Minister Charles Cooper huntu ku Servisio pa Obra Públiko (OW) ta informá ku a kuminsá ku trabounan pa drecha e plenchi na áltura di e Monumento Konmemorativo kaminda ta rekordá kaida di Koningin Juliana Brùg.
Kada aña, riba 6 di novèmber, Kòrsou ta konmemorá e desgrasia trágiko, esta e kaida di brùg mientras ku trahadónan tabata laborá. Mirando e estado aktual di e plenchi, OW a traha un plan pa drech’é. E trabounan ku lo ehersé ta:
• Pone klenku,
• Planta mata
• Pone banki,
• Pone baki sushi,
• Krea un espasio mas adekuá pa por instalá tènt i ekipo di sonido.
E trabounan aki tin un durashon di 4 siman, i ta na enkargo di e kontratista Ilusion General Contractors i lo no tin niun konsekuensia pa ku tráfiko.
