TRABOUNAN PA ALSA SEGURIDAT DI TRAFIKO RONDO DI 80 SKOL RÒNT KÒRSOU! - Informashon tokante Gobièrnu di Kòrsou Bo opinion

Notisia

TRABOUNAN PA ALSA SEGURIDAT DI TRAFIKO RONDO DI 80 SKOL RÒNT KÒRSOU!

Geplaatst op 03 October 2017 dor di Ministerio Tráfiko, Transporte i Planifikashon Urbano

Willemstad – Awe, 3 di òktober, Minister Zita Jesus-Leito huntu ku Servisio pa Obra Públiko (OW) a hasi apertura ofisial di e trabounan di infrastruktura na 80 skol rònt Kòrsou pa alsa seguridat di tráfiko. Seguridat di nos muchanan ta hopi importante. Nan mester por drenta i sali skol na un manera sigur.

E trabounan mes ta kuminsá dia 9 di òktober i lo tin un durashon di un siman . Durante e periodo aki lo mantené i/òf buta vários método pa alsa seguridat di tráfiko rondó di e skolnan. OW a hasi un investigashon i a selekshoná 80 skol kaminda nan situashon di seguridat ta mas agudo.

Mantenshon di skolnan tin komo propósito pa alsa e seguridat di tráfiko rondó di e skol. OW ta informá ku lo bai hasi e siguiente trabounan di infrastruktura na e diferente skolnan;
1. Limpia asera i/òf drecha asera,
2. Mantené i/òf buta ‘bermpaaltjes’,
3. Marka ‘zebrapad’,
4. Bòrchinan di tráfiko lo wòrdu ahustá i/òf lo buta bòrchi tráfiko,
5. Buta i/òf drecha drèmpel.
Kada área di skol ta diferente i lo mantené tur òf algun di e puntonan ariba menshoná. Si tur kos kana segun plan e trabounan di mantenshon ta finalisá den e di tres siman di e luna di òktober.

Minister Zita Jesus-Leito huntu ku OW i kontratistanan ta pidi indulgensia pa eventual molèster pa e kambio temporal. Tin kaminda ku lo desviá tráfiko si ta nesesario temporalmente. Pa kualke pregunta tokante e proyekto por tuma kontakto ku OW via e number 433-4327, Whats app +5999511-8582 òf via di e-mail info.vvrp@gobiernu.cw.

Ministerio konserní