Publiká riba 20 Yüli 2021
Willemstad – Minister Charles Cooper huntu ku su ministerio a logra pa trabounan di yenamentu di buraku rònt Kòrsou kuminsá. Ayera mainta a bai na e planta di asfalt na Landfill pa despues sigui rumbo pa Veeris pa yena e promé burakunan. Tin 4 kontratista ku ta ehekutá e trabounan aki den transkurso di e simannan benidero.
Den transkurso di e último añanan, e estado di nos kareteranan a bai hopi atras. Esaki pa motibu di entre otro falta di mantenshon struktural i falta di fondo. Tin kareteranan den hopi mal estado, tambe un gran kantidat di buraku a forma den kayanan rònt nos isla. Esaki ta un peliger pa tráfiko i por kousa daño na vehíkulonan.
Mirando e situashon agudo aki, Minister Charles Cooper a pone komo prioridat pa kuminsá na yena burakunan den nos kareteranan. Esaki ku e meta pa trese un alivio riba tèrmino korto. Banda di e trabounan di yenamentu di buraku, tin kareteranan ku tin mester di un poko mas atenshon ku djis yena buraku. Pa e kareteranan aki, ta trahando riba un sistema kaminda por saka un parti di e kaya, i pone un kapa di asfalt nobo einan.
Huntu ku esaki, Minister Charles Cooper ta enkamindando e trayekto pa re-introdusí Stichting Wegenfonds Curaçao pa por aloká fondonan di impuesto di vehíkulo (motorrijtuigenbelasting). Di e forma aki, lo tin un mihó maneho riba tèrmino largu pa mantenshon i rekonstrukshon nos kareteranan.
