Trabounan ta kontinuá pa por yega na konkretisá Kòrsou su miembresia komo miembro independiente di WTO - Informashon tokante Gobièrnu di Kòrsou Bo opinion

Notisia

Trabounan ta kontinuá pa por yega na konkretisá Kòrsou su miembresia komo miembro independiente di WTO

Geplaatst op 06 April 2020 dor di Ministerio Desaroyo Ekonómiko

WILLEMSTAD- Na inisio di mart di e aña aki Ministerio di Desaroyo Ekonómiko a kompartí e grato notisia di Kòrsou su akseso komo miembro opservadó di World Trade Organization(WTO). Resientemente nos a tuma nota di un publikashon di e divishon di akseso di WTO kaminda ta konta parti di Kòrsou su historia den komersio pero tambe un relato di nos posishon nobo komo miembro opservadó.

Sra. Giselle Mc William, minister di Desaroyo Ekonómiko ta sumamente orguyoso di e logro aki i ta positivo ku esaki lo aportá na un metamorfósis den e ekonomia di nos pais. Apesar di e situashon ekonómikamente difísil ku ta eksistí mundialmente na e momentunan aki, nos akseso komo miembro opservadó na WTO ta un stap den direkshon di un transformashon ekonómiko duradero pa Kòrsou.

E trayekto ku nos ta enkaminando pa bira miembro independiente den World Trade Organization i tambe e National Export Strategy ku Ministerio di Desaroyo Ekonómiko ta trahando riba dje bou di guia i ekspertisio di International Trade Centre (www.intracen.org) lo ta kardinal pa e transformashon ekonómiko aki por bira realidat. No opstante e retonan ekonómiko ku e tempu aki a trese kuné, nos tin ku keda enfoká i sigui ku e esfuersonan ku a bin ta tuma lugá. Netamente pa e motibu aki e trabounan ta kontinuá. For di nan kas kada organisashon i profeshonalnan ku ta kontribuí  na esaki huntu ku e timnan den MEO ta sigui traha pa ta prepará pa sigui padilanti.
Riba e página di Facebook di Ministerio di Desaroyo Ekonómiko por tuma nota di e publikashon kompletu di e  divishon di akseso di WTO. Depaso esaki ta disponibel tambe riba www.wto.org

 

Ministerio konserní