Publiká riba 15 Òktober 2018
Willemstad- A base di diferente pregunta ku a keda hasí últimamente na Minister Marilyn Alcalá-Wallé ta sigui un splikashon tokante transporte eskolar. Hóbennan entre 4 pa 16 aña tin e transporte eskolar normal manera e tabata semper, esta ku busnan chikitu o e konvoinan grandi di skol ku ta buska nsn pa skol i hiba nan bek.
Pa lokual ta trata hóbennan di 17 aña bai ariba, Gobièrnu a hasi un adaptashon chikitu den e maneho pa e hóbennan di 17 aña+ haña un karchi di konvoi pa bai skol ku ABC transportbedrijf. Esaki no ta kompletamente nobo ya ku tabatin un grupo ta trafika kaba via di ABC transportbedrijf, ku tambe ta un kompania di Gobièrnu, esta un kompania di pueblo. Ta importante pa suprayá ku transporte eskolar ta un fasilidat ku Gobièrnu ta duna na hóbennan den kuadro di mihó akseso na enseñansa.
Pa un hóben por bini na remarke pa transporte eskolar tin algun kondishon manera:
A. Salaris konhunto di mayornan no mag surpasá fl. 3.300,00. Mayornan mester por prueba esaki a base di un deklarashon ofisial di ofisina di impuesto;
B. Un Deklarashon Eskolar kaminda ta prueba ku e yu(nan) ta bishitá un skol;
C. Prueba ku e mayor/ tutor ta responsabel pa e yu(nan). Komo prueba por fungi: p.e. trouwboek/ buki di matrimonio, sentensia o veredikto di hues, deklarashon di parto;
D. E distansha di kas pa skol mester ta mas largu ku 3 kilometer. Si e distansha di kas pa skol ta denter di 3km, e hóben no ta bini na remarke pa transporte eskolar. (Di e forma aki ta garantisá ku e hóben ta keda alabes den moveshon);
E. E fasilidat di transporte eskolar en prinsipio ta bálido pa e hóbennan ku ta kai bou di e lei di enseñansa obligatorio. Pero si e hóben ta studiando na SBO, e tambe por bini na remarke.
Transporte públiko (ABC-busbedrijf):
Minister ta informá públiko ku e departamento di Transporte, te ku awor a risibí solamente dos (2) keho di hóbennan ku ta trafiká ku transporte públiko (ABC-busbedrijf) i ku ta akudiendo aktualmente na Maria Immaculata Lyceum na Otrobanda (ounke diferente hoben a fima e karta pa sosten).
Transporte Schoolbus/ bus chikitu:
Na e otro banda, tin diferente keho ta drenta frekuentemente di mayornan i di alumnonan ku ta trafiká ku e transporte speshal pa skol (tantu bus chikitu komo e “Schoolbus”-nan), kaminda nan ta indiká ku e transporte ku Gobièrnu ta paga mas karu p’e (3x mas karu), na diferente okashon no ta bin buska nan, òf no ta buska nan na ora, i tampoko ta komuniká o informá ku nan no ta bini. E hóbennan ta keda para na e sitio ku mester buska nan pa hiba skol, te ora ku nan bai kas bèk. Of nan ta yega skol lat. E reto aki tambe gobiernu ta atendiendo. Si tin mas keho, mayornan por entrega un keho na: Ministerie OWCS. Bonbini Business Center! Schottegatweg.
I si tin mas pregunta por yama alabes na 7324324 (pasenshi ya ku yamadanan ta bastante) .
