Publiká riba 17 Novèmber 2019
E momento di firma e Tratado tabata unu masha bunita, emoshonante i históriko pa eksperensiá komo e promé pais miembro asosiá di UNESCO ku ta firma na nòmber di Reino Hulandes. Pa hasi e akto di firmamento, Minister Alcalá-Wallé komo mandatario a haña apoderashon di Konseho di Minister di Reino pa firma e konvenio aki na nòmber di Reino Hulandes.
Aruba, den persona di Minister Rudy Lampe, ku tambe a duna su aporte i kontribushon na revishon di e Tratado bieu di 1974, pa yega na e Tratado nobo aki ku ingredientenan aktual tabata presente ya ku Aruba tambe a pidi pa e Tratado keda adoptá pa Aruba, meskos ku ta konta pa Kòrsou. Revision di e Tratado aki a tuma bastante aña i a konkluí riba 13 di yüli na Buenos Aires kaminda 23 pais di Latino Ameriká i Karibe (LAC), inkluso e Ministernan di Enseñansa di Aruba i Kòrsou, a partisipá. E Tratado/ Konbenio Regional nobo a wòrdu adoptá unánimamente na Buenos Aires. Sinembargo, Kòrsou mester a haña mandato di Reino Hulandes pa firma un lei haltu i máksimo manera un Tratado, ku tin un efekto amplio.
LAC ta un di e seis regionnan di UNESCO ku a revisá nan konvenio/ tratado di region i a hasi e kambionan i adaptashonnan nesesario pa kuadra ku e tempu di awor. Tur e seis regionnan di UNESCO entre tantu a revisá e Tratado riba e tema di rekonosimentu di estudio aki. Banda di e Tratado Regional, ku ta bálido pa e region nan separá, UNESCO a traha riba e Konbenio o Tratado Global, ku ta un lei universal pa garantisá ku tur pais miembro ta traha poulatinamente riba Rekonosimentu di Kualifikashonnan di Enseñansa Superior.
Dikon un Tratado Regional pa rekonosé edukashon superior ta nesesario? Ora un studiante disidí di bai studia na un instituto den eksterior, su empeño ta pa amplia i ekspandé su konosimentu, komplementá i mehorá su eksperensia den su edukashon, siña otro idioma, eksperensiá otro kultura, den buskeda di un mibó futuro. Gabinete Rhuggenaath su empeño kontinuo ta pa duna e oportunidat na nos siudadanonan pa nan desaroyá na nan máksimo potenshal.
Sea e studiante ta regresá kas òf ta disidí di keda migra, ta importante pa su papel i títulonan optené durante su estudio keda bálido i keda rekonosé i balorá, di moda ku e por traha i funshoná den e komunidat ku e bai biba, sin ku e ta konfrontá ku problema ku su papelnan di estudio ta keda rechasá.
Riba e foto por mira momento ku Minister Alcalá-Wallé ta firma e lei haltu, e tratado/ konvenio den presensha di Direktor General di UNESCO sra. Audrey Azoulay. Un Foto alabes kaminda e dos ministernan di Aruba i di Kòrsou ta sintá patras di e bòrchi di Reino Hulandes. I tambe un foto di e delegashon di Reino Presente, ku na Paris ta keda representá dor di señor Hans Wesseling, representante permanente pa Reino na Paris.
E foto di Reino ta komponé di e forma aki: Minister Plenipotensiario di Sint Maarten, sra. Jorien Wuite, Sr. Stein van Oosteren, vice Representante Permanente di Reino na UNESCO Paris, Minister di Enseñansa sra. Marilyn Alcalá-Wallé di Kòrsou, Minister di Enseñansa sr. Armando (Rudy) Lampe di Aruba, Sr. Hans Wesseling, Representante Permanente di Reino na UNESCO Paris i Minister Plenipotensiario di Kòrsou, sr. Anthony Begina.
Minister Alcalá-Wallé, na nòmber di Gabinete Rhuggenaath, ta felisitá e pueblo di Kòrsou ku e gran logro aki!
